టాప్ గేర్ లో ఉన్న కమెడియన్ సునీల్

కమెడియన్ గా స్టార్ ఇమేజ్ సంపాదించిన సునీల్ తన కెరీర్లో ఉన్నత దశలో ఉన్న సమయంలో హీరోగా మారడం కెరీర్ ను పూర్తిగా మలుపు తిప్పింది. మొదట్లో రెండు హిట్స్ తగిలినా ఆ తర్వాత వరస ఫ్లాపులతో అందరినీ నిరాశపరిచాడు. ఆడియన్స్ తనను హీరో కంటే కమెడియన్ గా చూడాలనుకుంటున్నారని గ్రహించిన సునీల్ ఫైనల్ గా కామెడీ రూట్లోకి వచ్చేశాడు.

రీ ఎంట్రీ తర్వాత 'సిల్లీ ఫెలోస్'.. 'అరవింద సమేత'.. 'పడి పడి లేచే మనసు' సినిమాల్లో నటించినా ఎందుకో మునుపటిలా క్లిక్ కాలేదు. అలా అని సునీల్ అభిమానులు నిరాశచెందాల్సిన పనే లేదు. ఎందుకంటే సునీల్ టాలెంట్ అలాంటింది. క్రికెట్ లో 'ఫామ్ ఈజ్ టెంపరరీ.. క్లాస్ ఈజ్ పర్మనెంట్' అనే సామెత ఉంది. అలానే హిట్లు ఫ్లాపులు వస్తుంటాయి.. పోతుంటాయి. కానీ టాలెంట్ మాత్రం పర్మనెంట్ కదా. సునీల్ టాలెంట్ కు.. తన టైమింగ్ కు తగ్గ పాత్ర ఒక్కటి పడితే మళ్ళీ చెలరేగిపోతానడంలో ఏమాత్రం సందేహం లేదు. రీసెంట్ గా రిలీజ్ అయిన 'చిత్రలహరి' టీజర్ లో సునీల్ తనదైన స్టైల్ లో చెలరేగిపోయినట్టుగా కనిపించాడు. ముఖ్యంగా మూంగ్ దాల్ ప్యాకెట్ డైలాగ్ చూస్తే ఎవరైనా నవ్వుల్లో మునిపోకుండా ఉండలేరు. దీంతో సునీల్ మళ్ళీ తన సత్తా చాటడం ఖాయమనే అభిప్రాయం వ్యక్తం అవుతోంది.

ఈ సినిమానే కాదు మారో నాలుగైదు సినిమాలు లైన్లో పెట్టాడు సునీల్. రవితేజ-VI ఆనంద్ సినిమా.. అల్లు అర్జున్ - త్రివిక్రమ్ ప్రాజెక్ట్ తో పాటుగా మరి కొన్ని సినిమాలలో కమెడియన్ గా నటిస్తున్నాడు సునీల్. 'అరవింద సమేత' సీరియస్ ఫిలిం కాబట్టి త్రివిక్రమ్ తన స్నేహితుడి కోసం ఎక్కువ కామెడీ ఉండే రోల్ ను త్రివిక్రమ్ డిజైన్ చేయలేకపోయాడు. కానీ ఈ సారి బన్నీ సినిమా ఫుల్ కామెడీ ఎంటర్టైనర్ అని సమాచారం. దీంతో సునీల్ కోసం హిలేరియస్ గా సాగే పాత్రను డిజైన్ చేస్తున్నాడనే టాక్ ఉంది. ఈ లెక్కన సునీల్ మళ్ళీ ప్రేక్షకులకు పొట్టనొప్పి తీసుకోస్తాడేమో.