కామెడీ క్యారెక్టర్లపై సునీల్ క్లారిటీ

మొత్తానికి హీరోగా సునీల్ కెరీర్ ముగిసిపోయినట్లే కనిపిస్తోంది. ఎన్ని ఫ్లాపులు వచ్చినా హీరో వేషాలే కావాలన్న పట్టుదలతో కనిపించేవాడు సునీల్. కానీ అతను కథానాయకుడిగా నటించిన సినిమాలు ఒకదాన్ని మించి ఇంకోటి డిజాస్టర్ కావడం.. మార్కెట్ పూర్తిగా దెబ్బ తినేయడంతో సునీల్ బ్యాక్ టు రూట్స్ అన్న తరహాలో కామెడీ వేషాలకు మారిపోయాడు. తాజాగా సునీల్ వ్యాఖ్యల్ని బట్టి చూస్తే ఇక హీరో క్యారెక్టర్లు చేసే అవకాశాలు కనిపించడం లేదు. కామెడీ పాత్రలు చేయడంలోనే తనకు సౌకర్యంగా ఉంటుందంటూ కొత్త మాటలు చెబుతున్నాడు సునీల్.

‘‘తాను మొదటిసారి హీరోగా నటించిన ‘అందాల రాముడు’ తర్వాత హీరోగా చాలా అవకాశాలే వచ్చాయని.. కానీ తన మీద తనకు నమ్మకం లేక అవి ఒప్పుకోలేదని సునీల్ చెప్పాడు. ఐతే రాజమౌళి దర్శకత్వంలో ‘మర్యాద రామన్న’ చేశాక నమ్మకం కుదిరి వరుసగా హీరో క్యారెక్టర్లు చేసినట్లు చెప్పాడు. మధ్యలో తనను కామెడీ రోల్స్ కి అడగడమే మానేశారని.. అందుకే ఆ క్యారెక్టర్లు చేయలేదని చెప్పాడు. నిజానికి తనకు కమెడియన్ గా నటించడమే హ్యాపీ అని.. అనేక రకాల పాత్రలు చేయొచ్చని సునీల్ తెలిపాడు.

తనను మళ్లీ కామెడీ క్యారెక్టర్లలో చూడాలని జనాలు ఎప్పట్నుంచో కోరుకుంటున్నారని.. మళ్లీ కమెడియన్ గా నటించబోతున్నట్లు తెలియగానే అందరూ సంతోషించారని సునీల్ చెప్పాడు. ఇటీవల అమెరికాకు వెళ్తే అక్కడి వాళ్లు కూడా కామెడీ రోల్సే చేయాలని కోరారని చెప్పాుడ సునీల్. ‘సిల్లీ ఫెలోస్’తో తాను కమెడియన్ గా రీఎంట్రీ ఇస్తున్నానని.. అలాగే తన మిత్రుడు త్రివిక్రమ్ శ్రీనివాస్ దర్శకత్వంలో రాబోతున్న ‘అరవింద సమేత’లో ‘అతడు’లోని పాత్ర తరహా క్యారెక్టర్ చేస్తున్నానని.. రవితేజ సినిమా ‘అమర్ అక్బర్ ఆంటోనీ’లో తన క్యారెక్టర్ అద్భుతంగా ఉంటుందని.. దీంతో పాటు శర్వానంద్ సినిమా ‘పడి పడి లేచె మనసు’లోనూ నటిస్తున్నానని సునీల్ తెలిపాడు.