'అరవింద' లో సునీల్ ఏం చేస్తాడు?

సునీల్ పూర్తి స్థాయి కామెడీ పాత్రలు వేసి చాలా కాలమే అయిపోయింది. కమెడియన్‌గా కెరీర్ పీక్స్‌లో ఉన్న సమయంలో హీరోగా మారి.. మొదట్లో మంచి విజయాలు ఖాతాలో వేసుకున్న సునీల్.. తర్వాత దారి తప్పాడు. వరుస ఫ్లాపులతో ఉక్కిరి బిక్కిరి అయ్యాడు. మళ్లీ కామెడీ వేషాల్లోకి మారమని చాలామంది సలహా ఇచ్చినా.. అది వెనకడుగు అవుతుందేమో అనుకుని హీరోగానే కొనసాగాడు. ఐతే హీరోగా దారుణమైన ఫలితాలు రావడం.. మార్కెట్ పూర్తిగా దెబ్బతినడంతో తిరిగి కామెడీ వేషాల్లోకి మారక తప్పలేదు. ‘సిల్లీ ఫెలోస్’లో కామెడీ టచ్ ఉన్న సెకండ్ హీరో తరహా పాత్ర చేశాడు కానీ.. అది జనాలకు రుచించలేదు. ఐతే ఇప్పుడు తన మిత్రుడు.. తనకోసం ఎన్నో మంచి పాత్రలు రాసిన త్రివిక్రమ్ శ్రీనివాస్ తీసిన ‘అరవింద సమేత’ లాంటి పెద్ద సినిమాలో ఫుల్ లెంగ్త్ కామెడీ రోల్ చేశాడు సునీల్.

ఇది తన కామెడీ కెరీర్‌కు రీలాంచింగ్ అవుతుందని సునీల్ ఆశిస్తున్నాడు. ఈ చిత్రంలో సునీల్ పాత్ర పేరు నీలాంబరి కావడం విశేషం. ఇందులో అతను గ్యారేజ్ నడిపే మెకానిక్‌గా కనిపిస్తాడట. కష్టాల్లో ఉన్న తనకు ఎన్టీఆర్ సాయం చేయడంతో అతడికి బంటులా మారతాడట. సినిమాలో చాలా సమయం హీరో వెంటే కనిపిస్తాడట సునీల్. కేవలం కామెడీనే కాక.. అతడి పాత్రను సెంటిమెంటు కోసం కూడా ఉపయోగించుకున్నాడట త్రివిక్రమ్. ‘అతడు’.. ‘మాస్’ లాంటి సినిమాల్లో సునీల్ పాత్రల్ని ఇది గుర్తుకు తెస్తుందని అంటున్నారు. ఈ సినిమాలో పూర్తిగా కామెడీ టచ్ రావడం కోసం సునీల్ అవతారం కూడా మార్చుకున్నాడు. సిక్స్ ప్యాక్‌లు.. కండలు అన్నీ పోయి.. మునుపటిలా బొద్దుగా తయారయ్యాడు. మరి ఒకప్పుడు సునీల్‌ కమెడియన్‌గా మంచి స్థాయి అందుకోవడానికి ఎంతగానో తోడ్పడిన త్రివిక్రమ్.. ఈసారి అతడినెలా ప్రెజెంట్ చేశాడో చూడాలి.