బాలీవుడ్‌ సినిమా మళ్లీ గాడిన పడాలి అంటే...!

కరోనా కాలం నుండి బాలీవుడ్ సంక్షోభంను ఎదుర్కొంటుంది. సౌత్‌ ఇండియాలో కరోనాకు ముందు పరిస్థితులు వచ్చినా కూడా బాలీవుడ్‌ లో మాత్రం ఇంకా పూర్తి స్థాయిలో కరోనాకు ముందు పరిస్థితులు రావడం లేదు. ఈ సమయంలో బాలీవుడ్ సీనియర్ నటుడు సునీల్‌ శెట్టి చేసిన వ్యాఖ్యలు అందరి దృష్టిని ఆకర్షిస్తున్నాయి.

తాజాగా ముంబయిలో ఉత్తర ప్రదేశ్ ముఖ్యమంత్రి యోగి ఆధిత్యనాథ్ ను సునీల్‌ శెట్టి తో పాటు బాలీవుడ్‌ ప్రముఖులు పలువురు కలిశారు. ఆ సందర్భంగా ఇండస్ట్రీకి సంబంధించిన పలు విషయాల గురించి ఆయనతో మాట్లాడటం జరిగిందట. హిందీ సినిమా ఇండస్ట్రీ ఎదుర్కొంటున్న సవాళ్లు మరియు ప్రభుత్వం పరంగా అందాల్సిన సాయం గురించి కూడా వారు తెలియజేశారట.

ఆ సందర్భంగానే సునీల్‌ శెట్టి మాట్లాడుతూ.. నేను బాలీవుడ్‌ లో 32 ఏళ్లుగా కొనసాగుతున్నాను. గతంలో ఎప్పుడు చూడని పరిస్థితులు ఇప్పుడు చూస్తున్నాను. కంటెంట్ ఉన్న సినిమాలు రూపొందించాల్సిన అవసరం ఈ సమయంలో చాలా ఉంది. సినిమాల మేకింగ్ విషయంలో ఫైనాన్స్ మరియు డేటా విశ్లేషకుల ప్రమేయం ఉండకూడదు.

ఫిల్మ్‌ మేకర్స్ ముఖ్యంగా యంగ్‌ ఫిల్మ్‌ మేకర్స్ కు ఛాన్స్ ఇవ్వాలి. వారి యొక్క విజ్ఞానం ను అందిపుచ్చుకోవడంతో పాటు వారి యొక్క ప్రతిభకు తగ్గట్లుగా అవకాశాలు ఇవ్వాల్సిన అవసరం ఉంది. ఈ మధ్య కాలంలో ఒక సినిమా సక్సెస్ అయితే దాన్ని ప్రచారం చేయడం లేదు. మన సినిమా సక్సెస్ అయితే పబ్లిసిటీ చేసుకోవడం తప్పనిసరి.

మన ఇండస్ట్రీ గురించి మనం మాట్లడకుండా మౌనంగా ఉండకూడదు. మన సినిమా స్థాయిని లోకానికి తెలియజెప్పాల్సిన సమయం ఇది. ఇక బాయ్ కాట్‌ హ్యాష్‌ ట్యాగ్‌ లు పెట్టే వారు కూడా దయచేసి ప్రస్తుతం బాలీవుడ్‌ ఉన్న పరిస్థితుల్లో మానుకోవాలి అంటూ సునీల్‌ శెట్టి విజ్ఞప్తి చేశాడు. బాలీవుడ్ సినిమా మళ్లీ గాడిన పడాలి అంటే ముఖ్యంగా యువతకు ప్రాముఖ్యత ఇవ్వాలని.. ప్రచారం తప్పనిసరి అన్నట్లుగా ఆయన అభిప్రాయం వ్యక్తం చేశాడు.

నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.