వావ్.. పవన్ సినిమాలో

హీరో అవతారం ఎత్తిన తొలి నాళ్లలో క్యారెక్టర్ రోల్స్ కూడా చేసేవాడు సునీల్. ‘పూల రంగడు’ లాంటి హిట్టు కొట్టాక కూడా అతను తన డైరెక్టర్ ఫ్రెండ్ త్రివిక్రమ్ శ్రీనివాస్ దర్శకత్వంలో ‘ఖలేజా’ చేశాడు. కానీ ఆ తర్వాత మాత్రం నెమ్మదిగా క్యారెక్టర్ రోల్స్ కు దూరమైపోయాడు. హీరో వేషాలకే పరిమితం అయిపోయాడు. సునీల్ ను కమెడియన్ గా జనాలు చాలా మిస్సవుతున్నా.. అతను మాత్రం హీరోగానే కంటిన్యూ అవుతూ వచ్చాడు. ఈ మధ్య మెగాస్టార్ చిరంజీవి రీఎంట్రీ మూవీ ‘ఖైదీ నెంబర్ 150’లో హీరో వెంటే ఉండే ముఖ్య పాత్రకు అడిగినా.. డేట్ల సమస్య వల్ల ఒప్పుకోలేదు సునీల్.

ఐతే ఎట్టకేలకు సునీల్ మళ్లీ నాన్-హీరో వేషంలో కనిపించబోతున్నట్లు సమాచారం. సునీల్ కోసం అతడి మిత్రుడైన త్రివిక్రమే ఓ స్పెషల్ క్యారెక్టర్ డిజైన్ చేశాడట. అది కూడా పవన్ కళ్యాణ్ సినిమాలో కావడం విశేషం. ఆల్రెడీ ప్రారంభోత్సవం జరుపుకున్న ఈ చిత్రం కొత్త ఏడాదిలో సెట్స్ మీదికి వెళ్లనుంది. గతంలో సునీల్ కోసం అదిరిపోయే కామెడీ క్యారెక్టర్లు డిజైన్ చేసిన త్రివిక్రమ్.. వాటికి ఏమాత్రం తీసిపోని రీతిలో తన కొత్త సినిమాలోనూ పాత్రను తీర్చిదిద్దినట్లు సమాచారం. ఈ సినిమాలో సునీల్ పాత్ర క్లిక్కయితే అతను మళ్లీ వరుసగా కామెడీ వేషాలు వేసే అవకాశాలున్నాయి. సునీల్ హీరోగా ప్రస్తుతం క్రాంతి మాధవ్ దర్శకత్వంలో ‘ఉంగరాల రాంబాబు’తో పాటు ఎన్.శంకర్ డైరెక్షన్లో ‘టు కంట్రీస్’ రీమేక్‌ లోనూ నటిస్తున్న సంగతి తెలిసిందే.