ఆ గ్యాంగుతో సునీల్ జాయిన్ అవుతున్నాడు

క‌మెడియ‌న్ గా బిజీబిజీగా ఉన్న స‌మ‌యంలోనే హీరోగా మారాడు సునీల్‌. మొద‌ట్లో సునీల్‌ హీరోగా న‌టించిన సినిమాలు బాగానే ఆడినా... ఈ మ‌ధ్య ప‌రిస్థితి అస్స‌లు బాగోలేదు. దాంతో హీరోగా ట్రై చేసేకంటే... మ‌ళ్లీ క‌మెడియ‌న్ వేషాలు వేసుకోవ‌డ‌మే బెట‌ర‌ని ఫీల్ అవుతున్నాడు సునీల్‌. ఆ నిర్ణ‌యం ఇలా తీసుకున్నాడో లేదో... అత‌న్ని వెతుక్కుంటూ చాలా సినిమాలు క్యూ క‌డుతున్నాయి కామెడీ వేషాల కోసం!

శ‌ర్వానంద్‌- సాయిప‌ల్ల‌వి హీరోహీరోయిన్లుగా తెర‌కెక్కుతున్న చిత్రం ‘ప‌డి ప‌డి లేచె మ‌న‌సు’. ‘అందాల రాక్ష‌సి’- ‘కృష్ణ‌గాడి వీర‌ప్రేమ‌గాథ‌’ వంటి మంచి ప్రేమ‌క‌థా చిత్రాల‌ను తెర‌కెక్కించిన హ‌నూ రాఘ‌వ‌పూడి ఈ చిత్రానికి ద‌ర్శ‌కుడు. ఈ సినిమాలో ఓ కీల‌క పాత్రలో సునీల్ న‌టిస్తున్నాడ‌ని స‌మాచారం. కామెడీ చేస్తూనే క‌థ‌లో కీల‌కంగా ఉండే ఆ పాత్ర న‌చ్చి... సునీల్ న‌టించేందుకు ఒప్పుకున్నాడ‌ట‌. ఇప్ప‌టికే 60 శాతం షూటింగ్ పూర్తిచేసుకున్న ఈ చిత్రం ఆగ‌స్టు నెల‌లో విడుద‌ల‌కి సిద్ధ‌మ‌వుతోంది. త్వ‌ర‌లో సునీల్‌- శ‌ర్వానంద్ గ్యాంగుతో జాయిన్ కాబోతున్నాడు. ఈ సినిమా ఒక‌ర‌కంగా సునీల్ సెకండ్ ఇన్నింగ్స్ లో మొద‌టి సినిమా అయ్యే అవ‌కాశం ఉంది.

ఇప్ప‌టికే త్రివిక్ర‌మ్‌- తార‌క్ సినిమాతో పాటు ర‌వితేజ త‌ర్వాతి సినిమాలోనూ కమెడియ‌న్ రోల్స్ ఒప్పుకున్నాడు సునీల్‌. అయితే త్రివిక్ర‌మ్ సినిమా ద‌స‌రా బ‌రిలో నిలుస్తుంద‌ని అంటుంటే... ర‌వితేజ సినిమా ఇంకా మొద‌లేకాలేదు. దాంతో హాస్య‌న‌టుడిగా రీఎంట్రీ ఇస్తున్న సునీల్... సెకండ్ ఇన్నింగ్స్ లో మొద‌ట రిలీజ‌య్యే సినిమా ‘ప‌డి ప‌డి లేచె మ‌న‌సు’ అవుతుంది. విజ‌యాల‌తో దూసుకుపోతున్న శ‌ర్వా... సునీల్‌ ని కూడా స‌క్సెస్ ట్రాక్ ఎక్కిస్తాడో లేదో చూడాలి.