సునీల్ భవిష్యత్ తేలే రోజు అదే..

కమెడియన్ గా ఉన్నపుడు మూడు పువ్వులు ఆరు కాయలు అన్నట్లుగా ఉండేది సునీల్ కెరీర్. ఐతే కామెడీ వేషాలతో జోరుమీదున్న సమయంలో హీరోగా మారి.. కెరీర్ ను మలుపు తిప్పుకున్నాడు కెరీర్. మొదట్లో కమెడియన్ వేషాలు కొనసాగిస్తూనే.. ‘అందాల రాముడు’.. ‘మర్యాద రామన్న’ లాంటి కామెడీ బేస్డ్ సినిమాలు చేయడంతో బండి సాఫీగానే సాగిపోయింది. కానీ తర్వాత మాస్ ఇమేజ్ కోసం ట్రై చేసి ట్రాక్ తప్పాడతను. భీమవరం బుల్లోడు.. మిస్టర్ పెళ్లికొడుకు.. కృష్ణాష్టమి.. జక్కన్న.. ఈడు గోల్డ్ ఎహే లాంటి సినిమాలతో వరుస ఫ్లాపులు ఎదుర్కొని బాగా వెనుకబడిపోయాడు సునీల్. ఇప్పుడు అతడి ఆశలన్నీ ‘ఉంగరాల రాంబాబు’ మీదే ఉన్నాయి.

చాన్నాళ్ల కిందటే షూటింగ్ పూర్తి చేసుకున్నప్పటికీ ఈ సినిమా విడుదలకు నోచుకోకపోతోంది. ఎట్టకేలకు ఈ సినిమా విడుదల తేదీని ప్రకటించారు. సెప్టెంబరు 15న ఈ చిత్రం ప్రేక్షకుల ముందుకు రాబోతోంది. ఈ నెలలో మిగతా వీకెండ్లన్నింటికీ సినిమాలు ఫిక్సయ్యాయి. మిగిలిన తేదీ సెప్టెంబరు 15 మాత్రమే. ఆ తేదీకే సునీల్ ఫిక్సయ్యాడు. ముందు వారం ‘యుద్ధం శరణం’తో పాటు ఇంకో రెండు సినిమాలు.. తర్వాతి రెండు వారాల్లో ‘జై లవకుశ’.. ‘స్పైడర్’ లాంటి భారీ సినిమాలుండగా వీటి మధ్య వస్తున్న ‘ఉంగరాల రాంబాబు’ ఎలా నెట్టుకొస్తుందో చూడాలి. ఈ సినిమా తేడా కొడితే సునీల్ కెరీర్ ప్రమాదంలో పడటం ఖాయం. ‘మళ్లీ మళ్లీ ఇది రాని రాజు’ ఫేమ్ క్రాంతి మాధవ్ దర్శకత్వంలో తెరకెక్కుతున్న ఈ చిత్రంలో మియా జార్జ్ కథానాయికగా నటిస్తోంది. పరుచూరి కిరీటి నిర్మాత.