సునీల్ కు విలన్ పాత్రలు కావాలట..

కమెడియన్ గా జోరుమీదున్న సమయంలో హీరోగా మారిన నటుడు సునీల్. ఒక సమయంలో కామెడీ పాత్రలు వేస్తూనే హీరోగానూ సినిమాలు చేసిన అతను.. ఆ తర్వాత కేవలం హీరో వేషాలకే పరిమితం అయ్యాడు. ఐతే తాను మళ్లీ కామెడీ పాత్రలు చేయాలనుకుంటున్నట్లు ఇటీవలే వెల్లడించాడు సునీల్. హీరోగా కన్నా.. కామెడీ రోల్స్ కన్నా తనకు విలన్ పాత్రలంటే చాలా ఇష్టమని అతను చెబుతుండటం విశేషం. ‘ఉంగరాల రాంబాబు’ పోస్ట్ రిలీజ్ ప్రెస్ మీట్లో అతనీ వ్యాఖ్యలు చేశాడు.

తన కెరీర్ గురించి సునీల్ స్పందిస్తూ.. ‘‘హీరోగా నా కెరీర్‌ బాగానే ఉంది. ‘అందాల రాముడు’లో హీరోగా అవకాశం వచ్చాక కూడా ఐదేళ్లు కామెడీ పాత్రలే చేశాను. ఇకపై కథానాయకుడిగా నటిస్తూనే.. కామెడీ పాత్రలూ చేస్తా. రాజేంద్రప్రసాద్‌ హాస్యనటుడిగా చేస్తూ హీరోగానూ చేశారు. అలాంటి నటులే నాకు స్ఫూర్తి. నిజం చెప్పాలంటే నాకు విలన్‌ పాత్రలంటే ఇష్టం. కానీ ఆ అవకాశం రావడం లేదు’’ అని సునీల్ తెలిపాడు.

‘ఉంగరాల రాంబాబు’ విషయంలో తమ చిత్ర బృందం సంతృప్తిగా ఉందన్న సునీల్.. ఈ సినిమా మంచి ఓపెనింగ్స్ సాధించిందన్నాడు. తాము ఆశించిన దాని కంటే ఈ సినిమా మంచి ఫలితం రాబట్టిందని చెప్పాడు. ‘టు కంట్రీస్’ రీమేక్ పూర్తయిందని చెప్పిన సునీల్.. గోపీ గణేశ్‌ దర్శకత్వంలో ఓ సినిమా చేయబోతున్నట్లు చెప్పాడు. మెగాస్టార్‌ చిరంజీవి 150వ సినిమాలో నటించడం కుదరలేదని.. కానీ ఆయన 151వ సినిమా ‘సైరా’లో తాను ఓ పాత్ర చేయబోతున్నానని సునీల్ వెల్లడించడం విశేషం.