సునీల్ పట్టుకొచ్చిన కొత్తమ్మాయి ఎవరు?

మియా జార్జ్.. తెలుగు సినిమాకు పరిచయం కాబోతున్న కొత్త హీరోయిన్. సునీల్ హీరోగా ఈ రోజే ప్రారంభోత్సవం జరుపుకున్న కొత్త సినిమాలో ఈ అమ్మాయే హీరోయిన్ గా నటించబోతోంది. క్యూట్ లుక్స్ తో చూడగానే ఆకట్టుకునేలా కనిపిస్తున్న ఈ అమ్మాయి మలయాళీ. పుట్టింది ముంబయిలో అయినా.. కేరళలోనే పెరిగింది. ముందు టీవీ సీరియల్స్ లో నటించి.. ఆ తర్వాత సినిమాల్లోకి రంగ ప్రవేశం చేసింది. మలయాళంలో మంచి పేరు సంపాదించాక తమిళంలోనూ అవకాశాలు అందుకుంది. టైమ్ మెషీన్ నేపథ్యంలో సాగే వెరైటీ మూవీ ‘ఇండ్రు నేట్రు నాళై’ ఆమెకు హీరోయిన్ గా మంచి బ్రేక్ ఇచ్చింది. ప్రస్తుతం తమిళంలో నాలుగైదు సినిమాల్లో నటిస్తున్న ఈమె సునీల్ సినిమా ద్వారా తెలుగు ప్రేక్షకులకు పరిచయం కాబోతోంది.

ఓనమాలు.. మళ్లీ మళ్లీ ఇది రాని రోజు లాంటి మంచి సినిమాలు తీసిన క్రాంతి మాధవ్.. సునీల్ కొత్త చిత్రానికి దర్శకత్వం వహించబోతుండటం విశేషం. పరుచూరి కిరీటి నిర్మాత. వి.వి.వినాయక్-దిల్ రాజు-సురేష్ బాబు-దామోదర్ ప్రసాద్.. లాంటి అతిరథ మహారథుల మధ్య ఈ రోజు ఉదయం ఫిలింనగర్ దైన సన్నిధానంలో ఈ చిత్ర ప్రారంభోత్సవం జరిగింది. సునీల్ హీరోగా తెరకెక్కిన గత మూడు సినిమాలూ డిజాస్టర్లయినప్పటికీ అతడితో సినిమా చేయడానికి క్రాంతి మాధవ్ లాంటి మంచి దర్శకుడు.. పరుచూరి కిరీటి లాంటి పెద్ద నిర్మాత ముందుకు రావడం విశేషమే. క్రాంతి మాధవ్ తొలి సినిమాకు ఖదీర్ బాబు.. రెండో సినిమాకు సాయిమాధవ్ బుర్రా అద్భుతమైన మాటలు రాశారు. ఈసారి చంద్రమోహన్ అనే కొత్త రచయితను పరిచయం చేస్తున్నాడు క్రాంతి మాధవ్.