'వకీల్ సాబ్' సమ్మతికి అసలు అర్ధం చెబుతుంది: సునీత కృష్ణన్

పవర్ స్టార్ పవన్ కళ్యాణ్ నటించిన వకీల్ సాబ్ ట్రైలర్ దేశవ్యాప్తంగా మంచి ఆదరణ దక్కించుకుంటుంది. ఈ సినిమా ప్రస్తుతం దేశానికి అవసరం అయినటువంటి సోషల్ మెసేజ్ నేపథ్యంలో ప్రేక్షకుల ముందుకు రాబోతున్న సందర్బంగా ప్రముఖ సోషల్ ఆక్టివిస్ట్, ప్రజ్వల ఎన్జివో కో-ఫౌండర్.. సునీత కృష్ణన్ వకీల్ సాబ్ సినిమా పై ప్రశంసల వర్షం కురిపించారు. దేశంలో సెక్స్ ట్రాఫికింగ్, మహిళల పై అఘాయిత్యాల గురించి వకీల్ సాబ్ సినిమా సబ్జెక్టులో సున్నితంగా టచ్ చేయనుంది. ఆమె మాట్లాడుతూ.. వకీల్ సాబ్ చెప్పేది ఒక్కటే.. మహిళలు 'నో అంటే నో' అని ప్రతి మగాడు అర్ధం చేసుకోవాలి. ఆడవారి రూపం లేదా వస్త్రధారణను గురించి కూడా ఆ మాట వర్తిస్తుందని అర్ధం చేసుకోవాలని సునీత కృష్ణన్ చెప్పారు.

ఈ సందర్బంగా ఆమె ట్విట్టర్ వేదికగా వకీల్ సాబ్ బృందాన్ని అభినందించారు. 'పవన్ కళ్యాణ్ గారితో పింక్ సినిమా రీమేక్ 'వకీల్ సాబ్' తెరకేక్కించినందుకు నిర్మాతలు దిల్ రాజు, బోణికపూర్ గార్లకు నా ధన్యవాదాలు. నాకు చాలా ఆనందంగా ఉంది. సమ్మతి అనే పదం పై యువతలో సరైన అవగాహన కల్పించడంలో ఈ సినిమా కీలకపాత్ర పోషిస్తుందని ఆమె తెలిపింది. ఇలాంటి ముఖ్యమైన సబ్జెక్టు కరెక్ట్ ప్లాట్ ఫామ్ పై పవర్ స్టార్ లాంటి బడా హీరోలతో సందేశం రూపంలో అందిస్తే అది తప్పకుండా ఎక్కువ జనాలకు చేరుతుంది. మరి వకీల్ సాబ్ అలాంటి పనే చేస్తుందని ఆశిస్తున్నట్లు సునీత తెలిపారు. అలాగే ఇలాంటి సోషల్ ఆక్టివిస్ట్ సపోర్ట్ చేయడం ఆనందించాల్సిన విషయం. చూడాలి మరి ఏప్రిల్ 9న వకీల్ సాబ్ ఎలాంటి సంచలనం సృష్టిస్తుందో..!