మరోసారి ఓటీటీకి వెళ్లే ఆలోచన లేదన్న సూపర్‌ స్టార్

ఈమద్య కాలంలో థియేటర్లు ఓపెన్‌ లేని కారణంగా జనాలు అంతా కూడా ఓటీటీల మీద పడుతున్నారు. ఈసమయంలో చాలా మంది ఫిల్మ్‌ మేకర్స్ కూడా తమ సినిమాలను ఓటీటీల ద్వారా విడుదల చేయాలనే నిర్ణయానికి వచ్చేస్తున్నారు. థియేటర్లు పునః ప్రారంభం అయ్యేది ఎప్పుడో తమ సినిమాలు విడుదల అయ్యేది ఎప్పుడో అంటూ విడుదలకు సిద్దంగా ఉన్న సినిమాలను ఓటీటీ ల ద్వారా ప్రేక్షకుల ముందుకు తోసేస్తున్నారు. గత ఏడాది చాలా సినిమాలు ఓటీటీ ద్వారా విడుదల అయ్యాయి. అందులో కొన్ని సక్సెస్‌ అవ్వగా కొన్ని నిరాశ పర్చాయి. మలయాళ సూపర్‌ స్టార్‌ మోహన్‌ లాల్‌ దృశ్యం 2 డైరెక్ట్‌ ఓటీటీ రిలీజ్ అయిన విషయం తెల్సిందే.

దృశ్యం 2 దారిలోనే ఆయన ప్రస్తుతం నటిస్తున్న భారీ చిత్రం 'మరక్కర్‌ లయన్‌ ఆఫ్‌ ది అరేబియన్‌ సి' ని కూడా ఓటీటీ రిలీజ్ చేసేందుకు ప్రముఖ ఓటీటీ లు ప్రయత్నాలు చేస్తున్నారు. భారీ మొత్తంలో అమౌంట్ ను ఆఫర్‌ చేసి మరీ ఆ సినిమాను కొనుగోలు చేసేందుకు ప్రయత్నాలు చేస్తున్నారు. కాని మోహన్‌ లాల్‌ మాత్రం ఈసారి తన సినిమాను ఓటీటీ ద్వారా విడుదల చేసేందుకు ఆసక్తి చూపించడం లేదు. తన వద్దకు వస్తున్న ఓటీటీ ఆఫర్లను వరుసగా తిరష్కరిస్తూ వచ్చాడు.

పదే పదే తన వద్దకు ఓటీటీ ఆఫర్లను తీసుకు వస్తున్న తన టీమ్ పై కూడా ఇటీవల అసహనం వ్యక్తం చేశాడట. ఎంత డబ్బు వచ్చినా కూడా ఈ సారి తన సినిమాను థియేటర్‌ లోనే విడుదల చేయాలని నిర్ణయించుకున్నారు. అది ఏ సమయం అయినా పర్వాలేదని ఖరాకండిగా చెప్పేశాడట. ఈ సినిమా లో కీర్తి సురేష్‌ హీరోయిన్‌ గా నటించగా సునీల్‌ శెట్టి.. మంజు వారియర్ కీలక పాత్రలో కనిపించబోతున్నారు.