సుప్రీమ్.. ఒకరోజు ముందుకొచ్చాడా?

ఇంతకుముందు దిల్ రాజు తన సినిమాల రిలీజ్ విషయంలో ఫుల్ క్లారిటీతో ఉండేవాడు. ప్లానింగ్ పక్కాగా ఉండేది. కానీ ఈ మధ్య ఆయన రిలీజ్ డేట్ల విషయంలో చాలా గందరగోళానికి గురవుతున్నాడు. టైమింగ్ విషయంలో ఎటూ తేల్చుకోలేకపోతున్నాడు. ‘కృష్ణాష్టమి’ విషయంలో ఇలాగే ఆయన ఆరు నెలలు ఎదురు చూసి చూసి.. కోటిన్నర దాకా నష్టపోయినట్లు చెప్పాడు. తన కొత్త సినిమా ‘సుప్రీమ్’ విషయంలోనూ ఆయన్ని కన్ఫ్యూజన్ వెంటాడుతోంది.

ఈ నెల ఆరంభంలోనే రావాల్సిన ఈ సినిమా అనుకోని కారణాలతో వాయిదా పడింది. ఇప్పుడు ఫస్ట్ కాపీ చేతిలో పెట్టుకుని మంచి టైమింగ్ కోసం చూస్తున్నాడాయన. మే 6న ‘24’ వస్తోందని తెలిసి కూడా మే తొలి వారంలో రిలీజ్ అని ప్రకటించేసిన రాజు.. ‘24’ కంటే ఒక రోజు ముందు.. అంటే మే 5వ తారీఖున తన సినిమాను రిలీజ్ చేసే ఆలోచనతో ఉన్నాడట. సోలో రిలీజ్.. లాంగ్ వీకెండ్ అడ్వాంటేజ్ కోసం ఈ నిర్ణయానికి వచ్చాడట రాజు. సీనియర్ పీఆర్వో బీఏ రాజు కూడా ఈ విషయాన్ని కన్ఫమ్ చేశారు.

‘24’తో పోటీ పడటం రిస్క్ అన్న అభిప్రాయం ఉన్నప్పటికీ.. సమ్మర్ సీజన్ కాబట్టి ఇబ్బందేం లేదని రాజు భావిస్తున్నాడట. పైగా రెండూ వేటికవే భిన్నమైన సినిమాలు కావడంతో దేని ప్రేక్షకులు దానికి ఉంటారని బరిలోకి దిగడానికే రెడీ అయిపోయాడట. ‘పటాస్’ ఫేమ్ అనిల్ రావిపూడి దర్శకత్వం వహించిన ఈ సినిమాలో సాయిధరమ్ సరసన రాశి ఖన్నా కథానాయికగా నటించింది. సాయికార్తీక్ సంగీత దర్శకుడు. సాయిధరమ్ ఇందులో ట్యాక్సీ డ్రైవర్ పాత్ర పోషించాడు.