సురేందర్ రెడ్డి దర్శకత్వంలో జాగ్వార్ హీరో!

జాగ్వార్ సినిమా టాక్ ఎలా ఉన్నా.. ఆ సినిమాతో కన్నడ ప్రేక్షకులకు బాగానే చేరువయ్యాడు కుమారస్వామి తనయుడు నిఖిల్ గౌడ. పోటీగా విడుదలైన వేరే పెద్ద సినిమాల కన్నా కూడా ‘జాగ్వార్’కు మంచి ఓపెనింగ్స్ రావడం ఆశ్చర్యం కలిగించే విషయమే. పెట్టుబడి తిరిగి తేకపోయినా.. నిఖిల్ కు హీరోగా మంచి ఆరంభాన్నే ఇచ్చిందని చెప్పాలి ఈ సినిమా.

ఈ ఉత్సాహంలో నిఖిల్ హీరోగా మరో భారీ బడ్జెట్ మూవీ తీయడానికి సన్నాహాలు చేస్తున్నాడు కుమారస్వామి. నిఖిల్ విషయంలో కుమారస్వామి మొదట్నుంచి తెలుగు దర్శకుల కోసమే ప్రయత్నిస్తున్నాడు. పూరి జగన్నాథ్ చేతుల మీదుగా తన కొడుకుని పరిచయం చేయాలని ప్రయత్నించి ఫెయిలైన ఆయన.. మహదేవ్ చేతికి నిఖిల్ ను అప్పగించాడు. ఐతే రెండో సినిమాకు మాత్రం ఒక తెలుగు స్టార్ డైరెక్టర్ ను ఫైనలైజ్ చేసినట్లు సమాచారం.

ఆ దర్శకుడు మరెవరో కాదు.. సురేందర్ రెడ్డి. ప్రస్తుతం రామ్ చరణ్ హీరోగా ‘ధృవ’ రూపొందిస్తున్న సురేందర్ తన తర్వాతి సినిమాను నిఖిల్ తోనే చేస్తాడట. ఇందుకోసం అతడికి భారీ పారితోషకమే ఆఫర్ చేసినట్లు సమాచారం. ఈ చిత్రం కూడా ‘జాగ్వార్’ తరహాలోనే కన్నడ-తెలుగు భాషల్లో తెరకెక్కుతుందని సమాచారం. ఆల్రెడీ ఈ సినిమాకు ప్రి ప్రొడక్షన్ కూడా మొదలైపోయినట్లు సమాచారం. త్వరలోనే ప్రకటన వచ్చే అవకాశముంది.