బుట్ట‌బొమ్మ క‌జిన్ ని బుట్ట‌లో వేసిన సూరి

వెబ్ సిరీస్ ల‌కు ఉన్న క్రేజ్ గురించి చెప్పాల్సిన ప‌నిలేదు. డిజిట‌ల్ సిరీస్ లు తార‌ల‌ను వెండి తెర‌కు ప్ర‌మోట్ చేస్తున్నాయి. బుల్లి తెర‌పై నిరూపించుకుని అమాంతం పెద్ద తెర‌పై అవ‌కాశాలు అందుకుంటున్నారు. తాజాగా ఆక్రేజ్ తోనే ఓ అప్ క‌మింగ్ భామ డిజిట‌ల్లో రాణించి ఏకంగా స్టార్ హీరో చిత్రంలోనే ఛాన్స్ అందుకుంద‌ని ప్ర‌చారం సాగుతోంది.

ఇంత‌కీ ఎవ‌రా భామ ? ఏ స్టార్ హీరో చిత్రం? అంటే వివ‌రాల్లోకి వెళ్లాల్సిందే. యూత్ స్టార్ నితిన్ హీరోగా స్టైలిష్ యాక్ష‌న్ చిత్రాల‌ ద‌ర్శ‌కుడు సురేంద‌ర్ రెడ్డి ఓ భారీ మూవీని తెర‌కెక్కించ‌డానికి రెడీ అవుతోన్న సంగ‌తి తెలిసిందే. ఇప్ప‌టికే స్క్రిప్ట్ ప‌నులు పూర్తి చేసిన సూరి న‌టీన‌టుల ఎంపిక‌లోనూ బిజీ అయిన‌ట్లు తెలుస్తోంది.

ఈ నేప‌థ్యంలో వెబ్ సిరీస్ హీరోయిన్ పాయ‌ల్ రాధాకృష్ణ‌న్ ని హీరోయిన్ గా ఎంపిక చేసిన‌ట్లు స‌మాచారం. పాయ‌ల్ రాధాకృష్ణ‌న్ `త‌ర‌గ‌తి దాటి బ‌య‌ట` అనే వెబ్ సిరీస్ లో న‌టించింది. ఈ వెబ్ సిరీస్ ఆహా ఓటీటీలో స్ట్రీమింగ్ అయింది. ఆ స‌మ‌యంలోనే పాయ‌ల్ సురెంద‌ర్ రెడ్డి దృష్టిలో ప‌డిన‌ట్లు తెలుస్తోంది. తొలి వెబ్ సిరీస్ లో మంచి పెర్పార్మ‌ర్ గా ప్రూవ్ చేసుకుంది. విమ‌ర్శ‌కుల ప్ర‌శంస‌లు ద‌క్కించుకుంది. అలాగే ఈ సిరీస్ తెలుగులో అమ్మ‌డికి మంచి క్రేజ్ కూడా తెచ్చిపెట్టింది. సినిమాల్లో అవ‌కాశాలు కూడా వ‌స్తున్న‌ట్లు ప్ర‌చారం సాగుతోంది. ఈ నేప‌థ్యంలోనే సూరి ఈ బ్యూటీపై క‌న్నేసిన‌ట్లు తెలుస్తోంది. ఇదే గ‌నుక నిజ‌మైతే పాయ‌ల్ కెరీర్ ట‌ర్న్ అయిన‌ట్లేన‌న్న గుస‌గుసా వినిపిస్తోంది.

పాయ‌ల్ గురించి మ‌రో ఇంట్రెస్టింగ్ అప్ డేట్ కూడా ఉంది. ఈ భామ బుట్ట‌బొమ్మ పూజాహెగ్డే కి దూర‌పు బంధువ‌ని స‌మాచారం. మంగుళూరులో పుట్టి పెరిగిన పాయ‌ల్ మోడ‌లింగ్ రంగం నుంచి సినిమాల వైపు ట‌ర్న్ తీసుకుంది. ఈ విష‌యంలో పూజా హెగ్డే గైడెన్స్ కూడా ఉంద‌ని తెలుస్తోంది. పూజా హెగ్డే టాలీవుడ్ లో స్టార్ హీరోయిన్ గా వెలిగిపోతోంది. అటు బాలీవుడ్ లోనూ బిజీ నాయిక‌. యువ‌త‌లో మంచి ఫాలోయింగ్ ఉంది. ప్ర‌స్తుతం అమ్మ‌డు ప‌ట్టింద‌ల్లా బంగార‌మే అవుతుంది. ఈ నేప‌థ్యంలో పాయ‌ల్ రాధాకృష్ణ‌న్ కి తెలుగులో పూజా ఇమేజ్ ప్ల‌స్ అయ్యే అవ‌కాశం లేక‌పోలేదు.