పూరి బాటలో సురేందర్ రెడ్డి?

మన టాలీవుడ్ స్టార్ డైరెక్టర్లలో పూరి జగన్నాథ్ స్టయిలే వేరు. మిగతా వాళ్లు కేవలం స్టార్స్‌తో మాత్రమే సినిమాలు తీస్తారు. చిన్న సినిమాలు చేయరు. కానీ పూరి జగన్నాథ్ అలా కాదు. ఎన్టీఆర్ లాంటి స్టార్‌తో సినిమా చేసి.. వెంటనే ‘జ్యోతిలక్ష్మి’ లాంటి లేడీ ఓరియెంటెడ్ మూవీ చేయడం అతడికి చెల్లింది. మిగతా స్టార్ డైరెక్టర్లెవ్వరూ ఇలాంటిసాహసాలు చేయలేదు. ఐతే ఇప్పుడు సురేందర్ రెడ్డి మాత్రం పూరి బాటలోనే ఓ చిన్న సినిమా చేయడానికి రెడీ అవుతున్నట్లు సమాచారం. అది స్ట్రెయిట్ మూవీ కూడా కాదు. తమిళంలో సూపర్ హిట్టయిన ‘గోలీసోడా’కు రీమేక్. ఈ సినిమా హక్కుల్ని చాన్నాళ్ల కిందటే లగడపాటి శ్రీధర్ కొనుక్కున్నారు.

‘గోలీసోడా’ పేరుకు పిల్లల సినిమా కానీ.. ఇందులో అదిరిపోయే యాక్షన్ ఉంది. మార్కెట్ యార్డులో పని చేసే నలుగురు పిల్లోళ్లు తమ ఆత్మగౌరవం కోసం పెద్ద విలన్‌ను ఎలా ఎదుర్కొని నిలబడ్డారనే కథాంశంతో తెరకెక్కిన ఈ సినిమా తమిళనాట సంచలన విజయం సాధించింది. లగడపాటి శ్రీధర్ కొడుకు ఇందులో ఓ కథానాయకుడిగా నటిస్తుండగా.. మిగతా మూడు పాత్రలకు సరైన వాళ్ల కోసం చూస్తున్నారు. ఐతే మంచి యాక్షన్ మూవీ కావడంతో దీనికి సురేందర్ రెడ్డి దర్శకత్వం వహిస్తే బాగుంటుందని శ్రీధర్ అప్రోచ్ అయ్యాడట. సురేందర్ తర్వాతి సినిమా రామ్‌చరణ్‌తో చేయాల్సి ఉంది. ఐతే అది మొదలవడానికి కొంచెం టైం పడుతుంది. ఆలోపు తక్కువ రోజుల్లో ‘గోలీసోడా’ పూర్తి చేయాలన్న ప్లాన్‌తో ఉన్నాడట సురేందర్. త్వరలోనే ఈ ప్రాజెక్టుకు సంబంధించి అఫీషియల్ అనౌన్స్‌మెంట్ రావచ్చు.