సపోర్టు కావాలంటున్న సురేష్‌ బాబు

''మామూలుగా ఏదో కొన్ని ఏరియాల్లో డిస్ర్టిబ్యూషన్ చేస్తాం కాని.. ఈ సినిమాను చూసిన వెంటనే మొత్తంగా నేనే తీసుకోవాలని డిసైడయ్యాను. ప్రతీరోజు మన జీవితాల్లో జరిగే విషయాలనే చాలా న్య ఏజ్ గా తీశారు. పాత రోజుల్లో ఎలా ఉండేది ఇప్పుడు ఎలా ఉంది సిట్యుయేషన్‌ అనే కంపారిజన్ బాగుంది'' అంటూ చెప్పుకొచ్చారు సురేష్‌ బాబు. నిజానికి ''పెళ్ళి చూపులు'' సినిమాను ముందుగా కేవలం పంపిణీ చేద్దాం అనుకుని.. ఇప్పుడు ఆంధ్రప్రదేశ్‌ - తెలంగాణాల్లో ఆయనే పూర్తిగా రిలీజ్ చేస్తున్నారు.

ఈ సినిమా గురించి చెబుతూ.. ఇంటర్నేషనల్ గా ఫాలో అయ్యే అనేక టెక్నాలజీలను వీరు ఫాలో అయ్యారని.. సింక్‌ సౌండ్‌ లో వాయిస్ రికార్డు చేయడం.. అలాగే ఆన్ లొకేషన్‌ సౌండ్‌ తీసుకోవడం.. చాలా కొత్త కొత్త రియల్‌ లొకేషన్లలో సినిమాను తీయడం.. 6కె ఫుటేజ్ తీయడం.. ఇలాంటి కొత్త టెక్నాలజీని ఒక చిన్న సినిమాలో ఇంప్లిమెంట్ చేయడం చాలా పెద్ద విషయం అంటూ పొగిడేశారాయన. కొత్త కుర్రాడు తరుణ్‌ భాస్కర్ తీసిన ఈ సినిమాలో ఎవడే సుబ్రమణ్యం ఫేం విజయ దేవరకొండ.. అలాగే ప్రేమ ఇష్క్ కాదల్‌ ఫేం రితూ వర్మ హీరోహీరోయిన్లుగా నటించారు. ఇప్పటికే ఈ సినిమా ట్రైలర్ అందరికీ విపరీతంగా నచ్చేయడంతో.. సినిమాను కబాలి వచ్చిన ఒక వారానికే.. అంటే జూలై 29నే.. రంగంలోకి దించేస్తున్నారు.

''ఇటువంటి సినిమాలు ఆడితే.. ఇలాంటి కొత్త కొత్త మేకర్లు ఇంకా పుట్టుకొస్తారు. అందుకే ఈ సినిమా కోసం అందరి సపోర్టు కావాలి. సినిమా గురించి ఏ పంపిణీదారుడు అడిగినా కూడా.. స్పెషల్‌ షో వేసి చూపిస్తాం. చూసిన తరువాత డెసిషన్‌ తీసుకోండి'' అంటూ చాలా ఛాలెజింగ్‌ గానే రిక్వెస్టు చేస్తున్నారు సురేష్‌ బాబు. చూద్దాం ఏమవుతుందో!!