వెంకీ మామ సినిమా పెద్దదే..

టాలీవుడ్ లో ఉన్న కొన్ని పెద్ద ప్రొడక్షన్ బ్యానెర్ లలో రామానాయుడు స్థాపించిన సురేష్ ప్రొడక్షన్స్ ఒకటి. అయన తదనంతరం దాని బాధ్యతలు సురేష్ బాబు సవీకరించి సినిమాలు తీయడం మొదలెట్టారు. గత కొంతకాలంగా ఒక్క పెద్ద సినిమా కూడా తీయకపోయేసరికి ప్రేక్షకులు ఆలోచనలో పడ్డారు. ఎందుకిలా జరిగింది అని సురేష్ బాబు నే అడగగా అలాంటిదేం లేదని త్వరలో ఒక పెద్ద సినిమాకి శ్రీకారం చుట్టబోతున్నామని ఆ సినిమా గురించి కొన్ని విశేషాలు వెల్లడించారు.

గత నెలలో ఈ నగరానికి ఏమైంది అని ఒక చిన్న సినిమా తో పెద్ద హిట్ కొట్టిన సురేష్ ప్రొడక్షన్స్ బ్యానర్ ఇప్పుడొక పెద్ద సినిమా తీయడానికి సిద్ధమవుతోందిట. అది మరేదో కాదు వెంకటేష్ మరియు నాగ చైతన్య నటిస్తున్న మల్టీస్టారర్ సినిమా. ఒక ఇంటర్వ్యూ లో మాట్లాడుతూ తాము తీయబోయే తదుపరి సినిమా ఇదేనని - అలానే ఇదొక పెద్ద బడ్జెట్ సినిమా అని తెలిపారు. ఈ సినిమాకు 'వెంకీ మామ' అనే టైటిల్ అనుకుంటుంటున్నామని చెప్పారు. అంతేకాదు. చిన్న సినిమాలు మాత్రమే తీస్తున్నారు అనే కామెంట్ పై కూడా తన అభిప్రాయాన్ని తెలియజేసి తమ బ్యానర్ ఇప్పటినుండి కొత్త సినిమాలు ప్రేక్షకుల ముందుకు తీసుకొస్తామని ధృవీకరించారు.

"కొందరు నిర్మాతలు చిన్న సినిమాలకే పరిమితమైపోతారు మరి కొందరేమో పెద్దవి మాత్రమే చేస్తూ ఉంటారు. ఈ తరహా సినిమాలు మాత్రమే ఆడతాయి అని ఎవ్వరం చెప్పలేం. బాహుబలి హిట్ అయ్యింది కాబట్టే పెద్ద సినిమాల వెనక పడుతున్నారు తప్ప ప్లాప్ అయ్యుంటే కనీసం వాటి జోలికి వెళ్లేవారు కాదు. సంతోషాన్నిచ్చే మరియు లాభాలు తెచ్చిపెట్టే సినిమాలు తీయాలి"అని చెప్పుకొచ్చారు సురేష్ బాబు.