బాషా సీక్వెల్ తెరపైకి వస్తోందా?

ట్రెండ్ సెట్టర్ అనే మాట చాలా ఈజీగా వాడేస్తుంటారు మన దర్శక నిర్మాతలు. కానీ అన్నవన్నీ ట్రెండ్ సెట్టర్లు అయిపోవు. నిజమైన ట్రెండ్ సెట్టర్లు కొన్నే ఉంటాయి. అలా దక్షిణాది పరిశ్రమ వరకు బిగ్గెస్ట్ ట్రెండ్ సెట్టర్ ఏదంటే ‘బాషా’ అనే చెప్పాలి. 90ల్లో వచ్చిన ఈ సినిమా స్ఫూర్తితో సౌత్ ఇండియాలో కనీసం వంద సినిమాలైనా వచ్చి ఉంటాయంటే అందులో అతిశయోక్తి ఏమీ లేదు. హీరో తన ఐడెంటిటీని కప్పి పుచ్చేసి ఓ సామాన్యుడిలా బతుకుతుండటం.. మధ్యలో ఫ్లాష్ బ్యాక్ ద్వారా అతడెవరన్నది చెప్పడం.. చివర్లో భారీ క్లైమాక్స్.. ఈ ఫార్ములాతో ఎన్ని సినిమాలు వచ్చాయో లెక్కే లేదు. తెలుగులో కూడా ఇలాంటి సినిమాలు బోలెడు వచ్చాయి.

అంత సంచలనం సృష్టించిన బాషాకు సీక్వెల్ తీయాలని దాని దర్శకుడు సురేష్ కృష్ణ చాలా కాలం నుంచి ప్రయత్నిస్తున్నాడు. రజినీ ముందుకే ఈ ప్రతిపాదన తీసుకెళ్లాడు కానీ.. ఆయన ఒప్పుకోలేదు. వేరే హీరోల్ని కూడా అడిగాడు కానీ.. సురేష్ కృష్ణ ట్రాక్ రికార్డు చూసి నో అనేశారు. ఐతే ఈ మధ్య అజిత్ ను కలిస్తే అతను మాత్రం పచ్చజెండా ఊపేశాడని కోలీవుడ్ వర్గాల సమాచారం. ఐతే వరుస హిట్లతో జోరుమీదున్న అజిత్.. గత దశాబ్దంన్నర కాలంలో ఒక్కటంటే ఒక్క హిట్టు లేని సురేష్ కృష్ణతో జత కట్టాలనుకోవడం.. అది కూడా బాషా సీక్వెల్లో కావడం కరెక్టా అని కోలీవుడ్లో చాలామంది సందేహిస్తున్నారు. మరి అజిత్ ఏం చేస్తాడో చూడాలి.