24... ఇంట్రెస్టింగ్ అప్ డేట్

24.. ఈ ఏడాది సౌత్ ఇండియాలో మోస్ట్ అవైటెడ్ మూవీస్ లో ఒకటి. సూర్య సినిమాలు మామూలుగానే వైవిధ్యంగా ఉంటాయి. ఇక సినిమా సినిమాకు పొంతనే లేకుండా వైవిధ్యం చూపించే విక్రమ్ కుమార్ తో సూర్య జట్టు కట్టాడంటే ఇక ఆ సినిమా ఎంత భిన్నంగా ఉంటుందో అంచనా వేయొచ్చు. టైటిల్ ప్రకటించిన నాటి నుంచి ఈ సినిమా మీద భారీ అంచనాలున్నాయి. ఇటీవలే షూటింగ్ కూడా పూర్తి చేసుకున్న ఈ సినిమా ప్రస్తుతం పోస్ట్ ప్రొడక్షన్ జరుపుకుంటోంది. విక్రమ్ తన కలల సినిమాగా చెబుతున్న ‘24’ ఇప్పటిదాకా మనం చూడని ఓ సరికొత్త అనుభూతిని పంచుతుందని సూర్య అంటున్నాడు. ‘24’కు సంబంధించిన విశేషాలేమీ అతను వెల్లడించలేదు కానీ.. ఈ టైటిల్ కు సంబంధించి ఓ ఇంట్రెస్టింగ్ అప్ డేట్ బయటికి వచ్చింది.

హీరో ఇందులో ఓ వాచ్ రిపేర్ షాప్ నడుపుతుంటాడట. అతడి దగ్గరికి రిపేర్ కోసం ఓ వాచ్ వస్తుంది. నిజానికది టైం మెషీన్. ఆ వాచ్ తయారు చేసిన సైంటిస్ట్ దాన్ని పోగొట్టుకుంటాడు. అది ఓ వ్యక్తి చేతికి వస్తే దాన్ని ఆపరేట్ చేయడమెలాగో అర్థం కాక రిపేర్ కోసం సూర్య చేతికిస్తాడు. అతడు దాన్ని ఆపరేట్ చేసి.. గతంలోకి, భవిష్యత్తులోకి ప్రయాణిస్తాడు. కాలంలో ప్రయాణం నేపథ్యంలో సాగుతుంది కాబట్టి 24 గంటలకు సూచికగా.. ఈ చిత్రానికి ‘24’ అని టైటిల్ పెట్టాడట విక్రమ్. సూర్య ఇందులో త్రిపాత్రాభినయం చేస్తున్నట్లు సమాచారం. అందులో ఓ నెగెటివ్ క్యారెక్టర్ కూడా ఉందట. సమంత - నిత్య మీనన్ హీరోయిన్లుగా నటిస్తున్నారు. మార్చి నెలాఖరులో ఈ చిత్రం ప్రేక్షకుల ముందుకు రానుంది.