సూర్య-కార్తి కలిసి..

సూర్య వారసత్వాన్నందుకుని హీరోగా అరంగేట్రం చేసి మంచి పేరు సంపాదించాడు కార్తి. నటనలో అన్నను అనుకరించకుండా తనకంటూ ప్రత్యేక గుర్తింపు సంపాదించాడతను. ఈ అన్నదమ్ములిద్దరినీ కలిసి ఒక సినిమాలో చూడాలని అభిమానులు ఎప్పట్నుంచో కోరుకుంటున్నారు. కానీ వారి కోరిక ఫలించలేదు. ఇదిగో అదిగో అంటున్నారే తప్ప కలిసి సినిమా మాత్రం చేయట్లేదు. ఐతే కలిసి సినిమాలో నటించకపోయినా.. ఒక సినిమా కోసం కలిసి పాట పాడుతుండటం విశేషం. ఆ సినిమా పేరు పార్టీ. వెంకట్ ప్రభు దర్శకత్వంలో తెరకెక్కుతున్న ఈ మల్టీస్టారర్ మూవీ కోసం సూర్య.. కార్తి గొంతు సవరించుకుంటున్నారు. అందులో ఒక వెరైటీ పాటను కలిసి ఆలపించబోతున్నారు.

వెంకట్ ప్రభు ఇంతకుముందు సూర్యతో ‘రాక్షసుడు’.. కార్తితో ‘బిరియాని’ అనే సినిమాలు తీశాడు. అవి రెండూ బాగానే ఆడాయి. వెంకట్ ప్రభుతో ఉన్న సాన్నిహిత్యం దృష్ట్యా వీళ్లిద్దరూ అతడి సినిమా కోసం పాట పాడేందుకు అంగీకరించారు. సత్యరాజ్.. జయరాం.. జై.. నాజర్.. రెజీనా.. రమ్యకృష్ణ.. నివేథా పెతురాజ్ తదితరులు ఇందులో కీలక పాత్రలు పోషించారు. వెంకట్ ప్రభు సినిమాలంటే మంచి ఎంటర్టైనర్లనే పేరుంది. ఆయన సినిమాలు చాలానే తెలుగులోకి వచ్చాయి. ‘రాక్షసుడు’.. ‘బిరియాని’తో పాటు ‘సరోజ’.. ‘గ్యాంబ్లర్’ సినిమాలు అనువాదమయ్యాయి. వీటిలో కొన్ని మంచి ఫలితాన్నందుకున్నాయి. తన కెరీర్లోనే అత్యధిక బడ్జెట్లో.. భారీ తారాగణంతో ‘పార్టీ’ సినిమాను తెరకెక్కించాడు వెంకట్. ఈ చిత్రం తెలుగులోకి కూడా అనువాదం కాబోతోంది.