సూర్య.. ఆశలు వదులుకోలేదు

సూర్య హీరో మాత్రమే కాదు.. నిర్మాత కూడా. ‘2డి ఎంటర్టైన్మెంట్స్’ పేరుతో బేనర్ పెట్టి తమిళంలో కొన్ని మంచి సినిమాలు నిర్మించాడు. అందులో ‘పసంగ-2’ కూడా ఒకటి. పాండిరాజ్ దర్శకత్వంలో రూపొందిన ఈ చిత్రంలో సూర్య కూడా ఓ కీలక పాత్ర పోషించాడు. బిందుమాధవి, అమలా పాల్ కూడా నటించారు. పిల్లల మనస్తత్వాలపై.. వారిని ఎలా పెంచాలనే అంశంపై తీసిన హార్ట్ టచింగ్ మూవీ ఇది. హిందీలో వచ్చిన అమీర్ ఖాన్ సినిమా ‘తారే జమీన్ పర్’ తరహాలో ఉంటుంది. ఈ చిత్రాన్ని ‘మేము’ పేరుతో తెలుగులోకి కూడా అనువదించారు. తమిళంతో పాటే తెలుగులోనూ ఒకేసారి రిలీజ్ చేయాలని భావించారు. కానీ కుదర్లేదు. దీంతో డిసెంబరు 24న తమిళంలో మాత్రమే రిలీజైందీ సినిమా.

పసంగ-2కు తమిళంలో అద్భుతమైన స్పందన వచ్చింది. చాలా మంచి రివ్యూలు వచ్చాయి. ఇండస్ట్రీలో, మీడియాలో దీని గురించి బాగా చర్చ జరిగింది. తమిళ ప్రేక్షకులు కూడా బాగా ఆదరించడంతో సినిమా పెద్ద విజయం సాధించింది. ఐతే తమిళంలో విడుదలై రెండు నెలలు దాటుతున్నా.. తెలుగు రిలీజ్ సంగతే పట్టించుకోకపోవడంతో ఇక ఈ సినిమా తెలుగులో రిలీజ్ కాదనే అనుకున్నారంతా. ఐతే ఉన్నట్లుండి ఇప్పుడు తెలుగు రిలీజ్ కు సన్నాహాలు చేస్తున్నారు. గత రెండు నెలలుగా పోటీ తీవ్రంగా ఉండటంతో వెయిట్ చేస్తూ వచ్చిన సూర్య.. మార్చి 18న ఖాళీ దొరకడంతో ఆ రోజు సినిమాను రిలీజ్ చేసేయాలని నిర్ణయించుకున్నాడు. మరి తమిళంలో లాగే తెలుగులోనూ ఈ సినిమా ఆదరణ పొందుతుందేమో చూడాలి.