అదిరే మల్టీ స్టారర్ రెడీ అవుతోంది

సౌత్ లో ఈ మధ్య మల్టీ స్టారర్ ట్రెండ్ బాగా ఊపందుకుంటోంది. సీతమ్మ వాకిట్లో సిరిమల్లె చెట్టుతో దీనికి నాంది పడినా ఆ తర్వాత పికప్ కావడానికి కొంత సమయం పట్టింది. ముఖ్యంగా సీనియర్ హీరోలు యూత్ స్టార్లతో నటించేందుకు ఉత్సాహం చూపుతున్నారు. నాగార్జున నానిల దేవదాస్ షూటింగ్ పూర్తి చేసుకునే దశలో 27 విడుదలకు రెడీ అవుతుండగా సంక్రాంతికి టార్గెట్ పెట్టుకున్న వెంకటేష్ వరుణ్ తేజ్ ల ఎఫ్2 కూడా మాంచి జోరు మీదుంది. వెంకటేష్ చైతు కలిసి చేస్తున్న వెంకీ మామ కూడా సెట్స్ పై సాగుతోంది. ఈ ట్రెండ్ కోలీవుడ్ లో కూడా మొదలైంది. అక్కడి ఓ మల్టీ స్టారర్ మనవాళ్ళను సైతం ఆకట్టుకుంటోంది. అదే సూర్య నటిస్తున్న 37వ సినిమా. ఇంకా టైటిల్ ఖరారు కానీ ఈ మూవీకి దర్శకుడు కెవి ఆనంద్. గతంలో ఈ ఇద్దరి కాంబోలో వచ్చిన వీడోక్కడే-బ్రదర్స్ గొప్ప సక్సెస్ కాకపోయినా మంచి పేరు తెచ్చాయి. ఆనంద్ మరో సినిమా రంగం తెలుగులో కూడా బ్లాక్ బస్టర్ గా నిలిచింది. అందుకే దీని మీద ఇక్కడ కూడా మంచి అంచనాలు ఉన్నాయి.

ఇందులో సూర్యతో పాటు మలయాళీ కంప్లీట్ యాక్టర్ మోహన్ లాల్ కూడా నటిస్తున్నాడు. జనతా గ్యారేజ్ లో జూనియర్ ఎన్టీఆర్ తో చేసాక ఇక్కడ మంచి గుర్తింపు తెచ్చుకున్న మోహన్ లాల్ ను మన్యం పులి సక్సెస్ ఇంకా దగ్గర చేసింది. అంతే కాదు వరుడు సినిమాతో విలన్ గా పరిచయమైన ఆర్య ఇందులో మరో హీరోగా నటిస్తున్నాడు. అత్తారింటికి దారేదిలో పవన్ కళ్యాణ్ తాతయ్యగా ముద్ర వేసిన బోమన్ ఇరానీ మరో పాత్రలో కనిపిస్తారు. హీరోయిన్ గా సాయేషా నటిస్తోంది. అఖిల్ సినిమాతో సౌత్ కు పరిచయమయ్యింది ఈ భామే. ఇటీవలే కార్తీ చినబాబులో కూడా పలకరించింది. ఇలా తెలుగు వాళ్లకు అన్ని రకాలుగా కనెక్ట్ అవుతున్న ఈ మల్టీ స్టారర్ ఇక్కడ కూడా క్రేజ్ తెచ్చుకోవడంలో డౌట్ లేదు. ఇటీవలే లండన్ షెడ్యూల్ పూర్తి చేసుకున్న ఈ మూవీ షూటింగ్ చెన్నైలో భారీ సెట్ లో జరుగుతోంది. ఏ జానర్ కు చెందిన కథనో బయటికి రాకుండా టీమ్ జాగ్రత్త పడుతోంది. వచ్చే సంక్రాంతికి విడుదల ప్లాన్ చేసిన ఈ మూవీ డేట్ ఇంకా ఫిక్స్ కాలేదు.