పవన్ కోరుకున్న కథలో సూర్య

ఏదైనా ఒక కథను ఓ హీరో కాదంటే.. మరో హీరో దగ్గరకు వెళ్లడం చూస్తూనే ఉంటాం. అలాగే ఒక థీమ్ తో ఓ పెద్ద హీరో సినిమా చేస్తే.. మరో హీరోకు ఎంతటి కోరిక ఉన్నా దానికి దూరంగా ఉండాల్సి వస్తుంది. మార్క్సిస్ట్ నేత చె గువేరాను పవన్ కళ్యాణ్ ఎంతగా అభిమానిస్తాడో తెలిసిందే. అప్పుడెప్పుడో వచ్చిన తొలిప్రేమ వంటి చిత్రాలలో కూడా బ్యాక్ గ్రౌండ్ లో చె గువేరా పోస్టర్ కనిపిస్తుంది.

ఆయన కథ కాకపోయినా.. అందుకు దగ్గరగా ఉండే రివల్యూషనరీ స్టోరీతో సినిమా చేయాలని పవన్ భావించాడు. అందుకు తగ్గ కథ స్టోరీ లైన్ ను కూడా తనే ప్రిపేర్ చేసుకున్నాడని అంటారు. కానీ ఇప్పుడు పవర్ స్టార్ సినిమాలకు దూరం అయిపోయాడు. తాత్కాలికంగానా.. పర్మినెంటుగానా అనే విషయాన్ని ఇప్పుడే చెప్పలేం కానీ.. పవన్ ను ఇలాటి సినిమాలో ఇప్పుడప్పుడే అయితే చూడలేమన్న మాట వాస్తవం. కానీ ఇప్పుడు కోలీవుడ్ హీరో సూర్య ఇలాంటి కథతోనే సినిమా స్టార్ట్ చేస్తున్నాడనే టాక్ గట్టిగానే వినిపిస్తోంది. సెల్వరాఘవన్ దర్శకత్వంలో ఎన్ జి కె అనే సినిమాను సూర్య అనౌన్స్ చేసిన విషయం తెలిసిందే.

ఈ చిత్రానికి సంబంధించిన థీమ్ పోస్టర్ చూస్తుంటే.. చె గువేరా మాదిరిగా అనిపించడంలో ఆశ్చర్యం లేదు. ఈ కథ అలాంటి విప్లవ భావజాలంతోనే ఉంటుందని అంటున్నారు. ఒకవేళ అదే నిజమైతే మాత్రం.. పవన్ నుంచి ఇలా సినిమా ఇక రాకపోవచ్చు. మొత్తానికి పవన్ డ్రీమ్ క్యారెక్టర్ ను సూర్య చేస్తున్నాడనే టాక్ అయితే బాగా వినిపిస్తోంది.