సూర్య ప్లానింగ్ అదిరిపోయింది

సూర్య తమిళంలో మాత్రమే కాదు.. తెలుగులోనూ స్టార్ హీరోనే. మధ్యలో అతడి సినిమాలు కొన్ని ఆడకపోయినప్పటికీ.. అతడి ఫాలోయింగేమీ తగ్గలేదు. సూర్య కొత్త సినిమా ‘24’ మీద తమిళంతో పాటు తెలుగులోనూ భారీ అంచనాలున్నాయి. ఈ చిత్రం అంచనాలకు తగ్గట్లు ఉండాలే కానీ.. తెలుగులోనే పాతిక కోట్ల దాకా షేర్ కలెక్ట్ చేసే అవకాశాలు పుష్కలంగా ఉన్నాయి. అందుకే ఈ సినిమాను తెలుగులో ప్రమోట్ చేసే విషయంలో చాలా శ్రద్ధ పెడుతున్నాడు సూర్య. టీజర్ రిలీజ్ చేసినపుడు కూడా తెలుగు ప్రేక్షకులకు ఏమాత్రం ప్రాధాన్యం తగ్గించలేదు సూర్య. ట్విట్టర్ లో తమిళ ట్రైలర్ రిలీజ్ చేసిన కొన్ని నిమిషాల్లోనే.. తెలుగు ట్రైలర్ కూడా లాంచ్ చేశాడు.

ఇప్పుడిక ఆడియో వేడుక విషయంలోనూ తెలుగు వాళ్లకు తానెంత ప్రయారిటీ ఇస్తానో చూపించబోతున్నాడు సూర్య. ఇందుకోసం తమిళంలో - తెలుగులో ఒకే రోజు ‘24’ ఆడియో రిలీజ్ చేయడానికి సన్నాహాలు చేసుకుంటున్నాడు సూర్య. ఈ నెల 11న ‘24’ ఆడియో విడుదలకు ముహూర్తం చూసుకున్న సూర్య.. ఆ రోజు ఉదయం చెన్నైలో తమిళ ఆడియో వేడుక నిర్వహించి.. ఆ రోజు సాయంత్రానికి తన టీంతో కలిసి హైదరాబాద్ వచ్చేయబోతున్నాడు. రాత్రికి 24 తెలుగు ఆడియో రిలీజవుతుంది. విక్రమ్ కుమార్ దర్శకత్వం వహిస్తున్న ఈ చిత్రానికి ఎ.ఆర్.రెహమాన్ సంగీతాన్నందిస్తున్న సంగతి తెలిసిందే. సినిమా మే నెలాఖర్లో లేదా జూన్‌ లో రిలీజయ్యే అవకాశాలున్నాయి.