స్టార్ హీరో ఈసారైనా హిట్ అందుకుంటాడా..?

తమిళ అగ్ర కథానాయకుడు సూర్య నటించిన తాజా చిత్రం ''సూరారై పొట్రు''. తెలుగులో సూర్యకు ఉన్న మార్కెట్ దృష్ట్యా ఈ చిత్రాన్ని 'ఆకాశం నీ హద్దురా' పేరుతో విడుదల చేస్తున్నారు. ఎయిర్ డెక్కన్ వ్యవస్థాపకుడు కెప్టెన్ గోపీనాథ్ జీవితంలో జరిగిన కొన్ని సంఘటనల ఆధారంగా ఈ సినిమా రూపొందించారు. 'గురు' ఫేమ్ సుధా కొంగర ఈ చిత్రానికి దర్శకత్వం వహించారు. సిఖ్య ఎంటెర్టైన్మెంట్స్ మరియు 2డీ ఎంటర్టైన్మెంట్ పతాకంపై సూర్య ఈ చిత్రాన్ని నిర్మించాడు. కరోనా కారణంగా థియేటర్స్ మూతబడి ఉండటంతో 'ఆకాశం నీ హద్దురా' సినిమాని డైరెక్ట్ ఓటీటీలో రిలీజ్ చేస్తున్నారు. ఇప్పటికే విడుదలైన ఈ సినిమా ట్రైలర్ అంచనాలను పెంచేసింది. ఈ చిత్రం అమెజాన్ ప్రైమ్ వీడియోలో నవంబర్ 12న రిలీజ్ కానుంది.

కాగా, 'ఆకాశం నీ హద్దురా' సినిమా కోసం సూర్య బాగా హార్డ్ వర్క్ చేసినట్లు తెలుస్తోంది. ఇంతకముందు ఏ సినిమాకూ రీడింగ్ సెషన్ అంటూ ప్రత్యేకంగా చేయని సూర్య.. ఈ సినిమా కోసం మొదటిసారి రీడింగ్ సెషన్స్ లో పాల్గొన్నారు. అంతేకాకుండా బయట ప్రొడ్యూసర్ అయితే ఇంత సమయం ఎందుకు.. ఇంత బడ్జెట్ ఎందుకు అని డౌట్స్ వ్యక్తం చేస్తారని సూర్య స్వయంగా ఈ చిత్రాన్ని నిర్మించాలని నిర్ణయించుకున్నాడు. ఇప్పుడు సూర్యకు ఈ సినిమా విజయం కీలకం కానుంది. ఎందుకంటే గత మూడేళ్ళుగా సూర్య నటించిన సినిమాలు మంచి కంటెంట్ లేక బాక్సాఫీస్ వద్ద ఫెయిల్ అవుతున్నాయి. ఈ విషయంపై ప్రధానంగా ద్రుష్టి పెట్టిన సూర్య ఇప్పుడు 'ఆకాశం నీ హద్దురా' సినిమాతో వస్తున్నాడు. మరి ఈ చిత్రం ఓటీటీ ఆడియన్స్ ని ఏ మాత్రం ఆకట్టుకుంటుందో చూడాలి. ఇందులో సూర్యకు జోడీగా అపర్ణ బాలమురళి నటించింది. మోహన్ బాబు - జాకీష్రాఫ్ - పరేష్ రావల్ - ఊర్వశి - కరుణాస్ - వివేక్ ప్రసన్న ఇతర కీలక పాత్రల్లో కనిపిస్తున్నారు. దీపావళి కానుకగా ఈ నెల 12న అమెజాన్ ప్రైమ్ లో విడుదల చేయనున్నారు.