ఒక హీరో.. మూడు పాత్రలు.. ఐదు షేడ్లు

సౌత్ ఇండియాలో సినిమా సినిమాకు వైవిధ్యం చూపించే నటుడు సూర్య. ఒక సినిమాకు ఇంకో సినిమాకు పోలిక లేని పాత్రలు ఎంచుకుంటుంటాడు సూర్య. ఒకే సినిమాలో బోలెడు వేరియేషన్లు చూపించడంలోనూ సూర్య స్టయిలే వేరు. రాక్షసుడు - సికిందర్ - బ్రదర్స్.. ఇలా సూర్య నటించిన రీసెంట్ మూవీస్ చూసినా సూర్య పడ్డ కష్టం తెలిసిపోతుంది. సక్సెస్ ఫెయిల్యూర్లతో సంబంధం లేకుండా తన కష్టం తను పడుతుంటాడు సూర్య. ఇక దర్శకుడు విక్రమ్ కుమార్ కూడా సూర్య లాగే విభిన్నంగా ఆలోచించేవాడే. ఇష్టం - 13బి - ఇష్క్ - మనం.. ఇవీ అతడి సినిమాలు. అందులో ఒక సినిమాకు ఇంకో సినిమాకు సంబంధమే ఉండదు. మరి వీళ్లిద్దరి కాంబినేషన్లో సినిమా అంటే ఎంత వైవిధ్యం ఆశిస్తామో.. అంత వైవిధ్యం పోస్టర్లలోనే బయటపడింది.

ఇప్పటిదాకా రిలీజైన ‘24’ పోస్టర్లన్నీ ప్రేక్షకుల్ని మెస్మరైజ్ చేశాయి. ఇప్పుడిక ఫస్ట్ లుక్ టీజర్ కు ముహూర్తం కుదిరింది. శుక్రవారం సాయంత్రం 6 గంటలకు ఈ మోస్ట్ అవైటెడ్ టీజర్ రిలీజవబోతోంది. ఈ టీజర్ కోసమే దాదాపు నెల రోజులుగా పని చేస్తోందట ‘24’ టీమ్. దాన్ని అంత ప్రత్యేకంగా తీర్చిదిద్దిందట. ఇప్పటికే చెన్నైలో కొందరు మీడియా ప్రతినిధులకు ఈ టీజర్ చూపించారట. వాళ్లందరూ స్టన్ అయిపోయినట్లు సమాచారం. సూర్య మూడు విభిన్నమైన అవతారాల్లో కనిపిస్తాడట టీజర్లో. పాత్రలు మూడైనా.. అందులో ఐదు షేడ్లు ఉంటాయట. సైంటిస్టుగా, గ్యాంగ్ స్టర్ గా కనిపించే పాత్రలు హైలైట్ అంటున్నారు. సినిమా కాన్సెప్ట్ ఏంటన్నది అర్థం కాకపోయినా.. విజువల్స్ స్టన్నింగ్ గా ఉంటాయిని చెబుతున్నారు. రెహమాన్ బ్యాగ్రౌండ్ స్కోర్ గురించి కూడా ప్రత్యేకంగా మాట్లాడుతున్నారు. మరి అంతగా ‘24’ టీజర్లో ఏముందో తెలియాలంటే ఇంకొక్క రోజు ఆగితే చాలు.