వెంకీకి ఫిట్టింగ్ పెట్టేశాడుగా

విక్టరీ వెంకటేష్ కొత్త సినిమా ‘గురు’ గత నెలలోనే షూటింగ్ పూర్తి చేసుకుంది. పోస్ట్ ప్రొడక్షన్ కార్యక్రమాలు కూడా శరవేగంగా జరిగిపోతున్నాయి. ఇంకో వారం పది రోజుల్లో ఫస్ట్ కాపీ రెడీ అయిపోతుంది. కావాలనుకుంటే సంక్రాంతికే కూడా రిలీజ్ చేసేయొచ్చు. ఓ దశలో ఆ చిత్రాన్ని పండక్కే రిలీజ్ చేయాలని కూడా అనుకున్నారు. కానీ పోటీ మరీ ఎక్కువ ఉందని భావించి జనవరి 26న సినిమాను సోలోగా రిలీజీ్ చేయడానికి సన్నాహాలు చేసుకున్నారు. కానీ ఇప్పుడు వారి అంచనా తప్పింది. ‘గురు’కు గణతంత్ర దినోత్సవం రోజు గట్టి పోటీ ఎదురవుతోంది. ఈ నెలలోనే రావాల్సిన సూర్య సినిమా ‘ఎస్-3’ జనవరి 26న విడుదల కాబోతోంది.

‘ఎస్-3’ రిలీజ్ డేట్ విషయంలో వారం పది రోజులుగా నెలకొన్న సందిగ్ధతకు ఎట్టకేలకు తెరదించారు. ఈ చిత్రం గణతంత్ర దినోత్సవ కానుకగా రిలీజవుతుందని నిర్మాత జ్నానవేల్ రాజా ప్రకటించాడు. ఇప్పటికే రెండుసార్లు సినిమా వాయిదా పడ్డ నేపథ్యంలో మళ్లీ ఇంకోసారి రిలీజ్ డేట్ మార్చే పరిస్థితి ఉండదు. కాబట్టి జనవరి 26న ‘ఎస్-3’ పక్కాగా విడుదలయ్యే అవకాశముంది. ‘ధృవ’ సినిమా వచ్చిన రెండో వారానికి ‘ఎస్-3’ వస్తుందంటేనే అల్లు అరవింద్ కంగారు పడి ఆ చిత్రాన్ని వాయిదా వేయించాడు. మరి ‘గురు’తో ‘ఎస్-3’ డైరెక్టుగా ఢీకొట్టబోతోంది. మరి ఆ పోటీని వెంకీ మూవీ ఎలా తట్టుకుంటుందో చూడాలి. కాకపోతే ఇది తక్కువ బడ్జెట్లో తెరకెక్కిన సినిమా కావడం.. పైగా తమిళంలో హిట్టయిన సినిమాకు రీమేక్ కావడం వల్ల మరీ కంగారు పడాల్సిన పని లేదేమో.

Like Us on Facebook : https://www.facebook.com/Tupakidotcom/