సూర్య ఫ్యాన్స్.. సినిమా కొనేశారు!!

సినిమా తారలకు.. స్టార్ హీరోలకు అభిమానులు బోలెడంత మంది ఉంటారు. సౌత్ లో అయితే.. ఈ అభిమానం అనేది దాదాపు భక్తి రేంజ్ లో ఉంటుంది. తన అభిమాన హీరోకోసం ఏం చేసేందుకైనా వెనకాడరు చాలా మంది. తమ హీరో రికార్డుల కోసం ఇతర హీరోల ఫ్యాన్స్ తో రకరకాలుగా పోటీ పడుతుంటారు. ఇప్పుడు సూర్య ఫ్యాన్స్ మాత్రం ఓ కొత్త రూట్ లో తమ అభిమానం చాటుకున్నారు.

ఆల్ కేరళ సింగం సూర్య ఫ్యాన్స్ అండ్ వెల్ఫేర్ అసోసియేషన్ అనే సంస్థ.. ఇప్పుడు సూర్య కొత్త సినిమా ఎస్3 రైట్స్ ను కొనుగోలు చేయడం షాక్ తినే అంశమే. ఓ ఫ్యాన్ గ్రూప్ ఏకంగా ఒక సినిమాకి ఏకంగా స్టేట్ వైడ్ రైట్స్ దక్కించుకోవడం.. ఇప్పటివరకూ ఎక్కడా జరగలేదు. కేరళ స్టేట్ లో ఎస్3 కి సంబంధించిన థియేట్రికల్ రైట్స్ అన్నీ ఈ అభిమానులవే అన్న మాట. కేరళలో సోపానం ఎంటర్టెయిన్మెంట్స్ అనే సంస్థ సహాయంతో ఎస్3 రిలీజ్ కు ప్లాన్ చేసుకుంది ఈ ఫ్యాన్ గ్రూప్.

సింగం సిరీస్ లో మూడో భాగంగా వస్తున్న ఎస్3 ని.. డిసెంబర్ 16న రిలీజ్ చేయబోతున్నారు. అనుష్క.. శృతిహాసన్ లు హీరోయిన్ లుగా నటించగా.. రీసెంట్ గా విడుదలైన ట్రైలర్ కు మంచి స్పందన వచ్చింది. యాక్షన్ సీన్స్ ను అభిమానించే మాస్ ప్రేక్షకుల కోసం స్పెషల్ గా కట్ చేయించినట్లుగా ఉంటుంది ఎస్3 థియేట్రికల్ ట్రైలర్.



Like Us on Facebook : https://www.facebook.com/Tupakidotcom/