సూర్య కూడా ఈ కాంటెస్టులు మొద‌లెట్టేశాడే!

యువ‌త‌లోని టాలెంట్ ను బ‌య‌ట‌కు తేవాల‌న్న ఉద్దేశం మంచిదే. అయితే ఆ ఉద్దేశం వెనుక దాగి ఉన్న మ‌ర్మమేంటో తెలియ‌క ఇప్పుడు అగ్ర హీరోలు ప్ర‌క‌టిస్తున్న షార్ట్ ఫిల్మ్ కాంటెస్టుల‌పై పెద్ద చ‌ర్చకే తెర లేసింది. కొంద‌రు హీరోల‌తో పాటు కొంద‌రు డైరెక్ట‌ర్టు - నిర్మాత‌లు కూడా ఈ త‌ర‌హా షార్ట్ ఫిల్మ్ కాంటెస్టులు నిర్వ‌హిస్తున్న‌ట్లు ఇటీవ‌ల ప‌లు ప్ర‌క‌ట‌న‌లు వ‌చ్చాయి. ప్ర‌క‌ట‌న‌ల‌కు స్పందించిన ప‌లువురు సినీ ఔత్సాహికులు తాము రూపొందించిన షార్ట్ ఫిల్మ్‌ ల‌ను కూడా పోటీల‌కు పంపేశారు.

అయితే ఆ కాంటెస్టుల‌కు సంబంధించిన రిజ‌ల్ట్స్ మాత్రం ఇప్ప‌టిదాకా విడుద‌లైన దాఖ‌లా మాత్రం క‌నిపించ‌లేదు. దీంతో అసలు ఈ కాంటెస్టులు యువ‌త‌లోని టాలెంట్ ను బ‌య‌ట‌కు తీసేందుకు ఉద్దేశించిన‌వా? లేదంటే... వారిలోని నైపుణ్యాన్ని కాపీ కొట్టేందుకు స‌ద‌రు హీరో - ద‌ర్శ‌కుడు - నిర్మాత‌లు ఈ త‌ర‌హా న‌యా మోసానికి తెర తీశారా? అన్న అనుమానాలు రేకెత్తుతున్నాయి. ఇటీవ‌లే ఓ టాలీవుడ్ టాప్ డైరెక్ట‌ర్ ఓ టీవీ ఛానెల్‌తో క‌లిసి ఈ త‌ర‌హా పోటీకి ప్ర‌క‌ట‌న విడుద‌ల చేశారు. అయితే ఆ త‌ర్వాత స‌ద‌రు డైరెక్ట‌ర్ నుంచి గానీ, ఆ ఛానెల్ నుంచి గానీ స‌ద‌రు పోటీకి సంబంధించిన రిజ‌ల్ట్స్ మాత్రం వెల్ల‌డి కాలేదు.

ఈ కాంటెస్టు ఫ‌లితాలు ఎప్పుడు విడుద‌లవుతాయ‌ని చూస్తుండ‌గానే... కోలీవుడ్ యంగ్ హీరో ధ‌నుష్ కూడా ఇదే త‌ర‌హా పోటీని ప్ర‌క‌టించాడు. యూట్యూబ్ లో స్పెష‌న్ యాప్‌ ను విడుద‌ల చేసి మ‌రీ అత‌డు ప్ర‌క‌టించిన ఈ కాంటెస్టుకు సంబంధించిన రిజ‌ల్ట్స్ కూడా ఇప్ప‌టిదాకా విడుద‌ల కాలేదు. ఇక‌పోతే.. తాజాగా సింగం హీరో సూర్య కూడా తాజాగా షార్ట్ ఫిల్మ్ కాంటెస్టును ప్ర‌క‌టించాడు. ఇత‌రుల‌కు భిన్నంగా ఈ కాంటెస్టుకు న‌గ‌దు బ‌హుమతిని కూడా ప్ర‌క‌టించేసిన సూర్య‌... తానైనా ఫ‌లితాల‌ను - విజేత‌ను ప్ర‌క‌టిస్తాడో? లేదో? చూడాలి.

Like Us on Facebook : https://www.facebook.com/Tupakidotcom/