సింహం సింగిల్‌గా రావాల‌ని!

నాన్నా పందులే గుంపుగా వ‌స్తాయి.. సింహం సింగిల్‌గానే వ‌స్తుంద‌ని సూప‌ర్‌స్టార్‌ ర‌జ‌నీకాంత్ చెప్పిన‌ట్టు సింగం సూర్య సింగిల్‌గా వ‌చ్చేందుకు ప్లాన్ చేశాడని తాజా సీన్ చెబుతోంది. పోటీ ఎందుకులే అని అనుకున్నాడా.. లేక మంచి రిలీజ్ తేదీతో సింగిల్‌గానే రావాల‌నుకున్నాడో మొత్తానికి సూర్య సోలో అయిపోయాడు!

అస‌లింత‌కీ ఏంటి మ్యాట‌ర్‌? అంటారా... గ‌త కొంత‌కాలంగా సూర్య కెరీర్‌కి స‌రైన హిట్టు అన్న‌దే ప‌డ‌లేదు. తాను ఎన్నో ఆశ‌లు పెట్టుకున్న `సింగం 3` సైతం పెద్ద దెబ్బ కొట్టింది. దీంతో అత‌డు ప్ర‌తిదీ ఆచితూచి అడుగులేయాల్సి వ‌స్తోంది. వాస్త‌వానికి ప్ర‌స్తుతం సెల్వ‌రాఘ‌వ‌న్ ద‌ర్శ‌క‌త్వంలో తెర‌కెక్కుతున్న `ఎన్‌జీకే` చిత్రాన్ని దీపావ‌ళి కానుక‌గా రిలీజ్ చేయాల‌ని ప్లాన్ చేశారు. కానీ ఇప్పుడు దీపావ‌ళి రేస్ నుంచి విర‌మించుకున్నార‌ని తెలుస్తోంది. అస‌లు కార‌ణ‌మేంటి? అంటే... దీపావ‌ళికి ఇల‌య‌ద‌ళ‌ప‌తి విజ‌య్ - ఏ.ఆర్‌.మురుగ‌దాస్‌ల స‌ర్కార్‌` రిలీజ్‌ బ‌రిలో ఉంది. దాంతో సోలో రిలీజ్‌నే బెట‌ర్ అని సూర్య‌- సెల్వ అండ్ టీమ్ భావించార‌ట‌. దాంతో తాము రేస్ నుంచి త‌ప్పుకోవాల‌నుకుంటున్నామ‌ని హింట్ ఇచ్చేశారు.

విజ‌య్ .. సూర్య‌నే కొట్టేంత మొన‌గాడా? అంటే.. ప్ర‌స్తుతం సింగం స‌న్నివేశం ఏమంత బాలేద‌న్న ముచ్చ‌టా సాగుతోంది. సూర్య, సెల్వ రాఘ‌వ‌న్ ఇద్ద‌రి కెరీర్ అంతంత మాత్రంగానే ఉంది. వీళ్ల‌కు అన్నీ ప‌రాజ‌యాలే ఉన్నాయ్‌. అందుకే కాస్త ఆచి తూచి అడుగులేస్తున్నారు. దానికి తోడు మురుగ‌దాస్ - విజ‌య్ కాంబినేష‌న్ అంటేనే సెన్సేష‌న్స్‌. ఆ ఇద్దరి కాంబోలో హ్యాట్రిక్ విజ‌యాలు వ‌చ్చాయి. ఇప్పుడు నాలుగో సినిమా `స‌ర్కార్‌`తోనూ బంప‌ర్ హిట్ కొట్టేయాల‌న్న పంతంతో ఉన్నారు. అందుకే దీపావ‌ళి రేస్‌ని ఫిక్స్ చేసుకున్నారు. `స‌ర్కార్` ప‌క్కా పొలిటిక‌ల్ థ్రిల్ల‌ర్ క‌థాంశంతో త‌మిళ‌నాట సంచ‌ల‌నాల‌కు సిద్ధ‌మ‌వుతోంది. రిలీజ్ ముంగిట ప్ర‌కంప‌నాలు ఖాయ‌మ‌న్న అంచ‌నాలేర్ప‌డ్డాయి.