'రాధే శ్యామ్' నుంచి డార్లింగ్ సర్ప్రైజింగ్ పోస్టర్..!

మరో రెండు రోజుల్లో పాన్ ఇండియా స్టార్ ప్రభాస్ పుట్టినరోజు ఉండటంతో సోషల్ మీడియాలో ఫ్యాన్స్ సందడి మొదలు పెట్టేసారు. ఇప్పటికే డార్లింగ్ అభిమానులు ట్విట్టర్ లో 'ప్రభాస్ బర్త్ డే మంత్' అనే హ్యాష్ ట్యాగ్ ను ట్రెండ్ చేస్తున్నారు. ఇదే క్రమంలో బర్త్ డే కానుకగా ప్రస్తుతం ప్రభాస్ నటిస్తున్న సినిమాల నుంచి ఫ్యాన్స్ కు సర్ప్రైజ్ ఇవ్వడానికి మేకర్స్ రెడీ అయ్యారు.

రాధాకృష్ణ కుమార్ దర్శకత్వంలో ప్రభాస్ నటిస్తున్న 'రాధే శ్యామ్' సినిమా నుంచి టీజర్ ని రిలీజ్ చేస్తున్నట్లు అధికారికంగా ప్రకటించారు. అక్టోబర్ 23 ఉదయం విక్రమాదిత్య ఎవరనే విషయాన్ని తెలియజేస్తామని తెలిపారు. అయితే అంతకంటే ముందుగా చిత్ర బృందం అభిమానుల కోసం ఓ సర్ప్రైజ్ ఇచ్చింది. ప్రభాస్ కు సంబంధించిన ఓ ఎక్స్ క్లూజివ్ పోస్టర్ ని దర్శకుడు తాజాగా సోషల్ మీడియాలో షేర్ చేశారు.

ప్రభాస్ ఇందులో ట్రెండీ కాస్ట్యూమ్స్ - బ్లాక్ గ్లాసెస్ ధరించి సూపర్ కూల్ అండ్ అల్ట్రా స్టైలిష్ గా కనిపిస్తున్నారు. ఇటీవల డార్లింగ్ లుక్ ని ట్రోల్ చేసిన వారందరి నోళ్లు మూయించేలా ఈ పోస్టర్ ఉంది. గ్లోబల్ ప్రభాస్ డే ని మరింత స్పెషల్ గా మార్చేలా చేసిన ఈ పిక్ తో ఫ్యాన్స్ ఆనందంలో ఎగిరి గంతేస్తున్నారు. 'డార్లింగ్ విక్రమాదిత్య' అంటూ 'రాధే శ్యామ్' దర్శకుడు పోస్ట్ చేసిన ఈ ఫోటో సోషల్ మీడియాలో వైరల్ అవుతోంది.

కాగా, యావత్ సినీ అభిమానులు ఆసక్తిగా ఎదురుచూస్తున్న పాన్ ఇండియా చిత్రాల్లో ''రాధే శ్యామ్'' ఒకటి. ఇది ప్రభాస్ కెరీర్ లో వస్తున్న 20వ చిత్రం. 70ల కాలం నాటి ఇటలీ నేపథ్యంగా సాగే ప్రేమ కథతో పీరియాడికల్‌ మూవీగా రూపొందుతోంది. ఇందులో ప్రభాస్ సరసన పూజాహెగ్డే హీరోయిన్ గా నటిస్తోంది. కృష్ణంరాజు - భాగ్యశ్రీ - జగపతిబాబు - ప్రియదర్శి తదితరులు కీలక పాత్రలు పోషిస్తున్నారు. 2022 సంక్రాంతి కానుకగా జనవరి 14న ఈ సినిమా ప్రేక్షకుల ముందుకు రాబోతోంది.

'రాధే శ్యామ్' చిత్రాన్ని కృష్ణంరాజు సమర్పణలో యూవీ క్రియేషన్స్ - టీ సిరీస్ - గీతాకృష్ణ సంస్థలు కలసి భారీ బడ్జెట్‌ తో రూపొందిస్తున్నాయి. వంశీ - ప్రమోద్ - భూషణ్ కుమార్ - ప్రశీద దీనికి నిర్మాతలుగా వ్యవహరిస్తున్నారు. జస్టిన్ ప్రభాకరన్ - మిథున్-మనన్ భరద్వాజ్ సంగీతం సమకూరుస్తున్నారు. మనోజ్ పరమహంస సినిమాటోగ్రఫీ అందిస్తున్న ఈ సినిమాకి కోటగిరి వెంకటేశ్వరరావు ఎడిటింగ్ వర్క్ చేస్తున్నారు.