కత్తి పట్టుకొని బయలుదేరిన సూర్య..!

కోలీవుడ్ స్టార్ హీరో సూర్య ప్రస్తుతం పాండిరాజ్ ద‌ర్శ‌క‌త్వంలో త‌న 40వ సినిమా చేస్తున్న సంగతి తెలిసిందే. ఇందులో ప్రియాంక అరుల్ మోహ‌న్ హీరోయిన్ గా నటిస్తోంది. ప్రముఖ నిర్మాణ సంస్థ స‌న్ పిక్చ‌ర్స్ బ్యాన‌ర్‌ పై ఈ సినిమా రూపొందుతోంది. ఇదొక సామాజిక అంశాలతో రూపొందే మాస్ యాక్షన్ అండ్ ఫ్యామిలీ ఎంటర్టైనర్ అని తెలుస్తోంది. ఇటీవలే ఈ సినిమా చిత్రీకరణ ప్రారంభించారు. కరోనా నుంచి కోలుకున్న హీరో సూర్య కూడా సెట్స్ లో అడుగుపెట్టినట్లు ఈ మధ్య మేకర్స్ వెల్లడించారు. ఈ క్రమంలో తాజాగా 'సూర్య40' సెట్స్ లో ఆయనకు సంబంధించిన ఓ ఫోటోని చిత్ర బృందం సోషల్ మీడియా మధ్యమాలలో షేర్ చేశారు.

సూర్య ఈ ఫొటోలో పెద్ద కత్తి పట్టుకొని బయలుదేరాడు. పంచె కట్టులో బ్యాక్ సైడ్ వ్యూలో కనిపిస్తున్న సూర్య అభిమానులను అలరిస్తున్నాడు. ఇది ఫైట్ సీన్ కు సంబంధించిన స్టిల్ అని అర్థం అవుతోంది. కాగా, 'సూర్య40' సినిమాలో స‌త్య‌రాజ్‌ - జయప్రకాశ్ - శరణ్య పొన్వన్నన్ - సుబ్బు పంచు - దేవదర్శిని కీలక పాత్రల్లో నటిస్తున్నారు. ఈ చిత్రానికి డి.ఇమాన్ సంగీతం సమకూరుస్తున్నాడు. రత్నవేలు సినిమాటోగ్రఫీ అందిస్తుండగా.. జాకీ ఆర్ట్ డైరెక్టర్‌ గా పని చేస్తున్నారు. ఫైట్ మాస్టర్స్ అన్బు-అరివ్ ఈ చిత్రానికి యాక్షన్ కొరియోగ్రఫీ చేస్తున్నారు. ఇంతకముందు సూర్య - పాండిరాజ్‌ కాంబినేషన్‌ లో ‘పసంగ 2’(మేము) సినిమా వచ్చింది. ఇప్పుడు అదే కాంబోలో వస్తున్న 'సూర్య40' పై మంచి అంచనాలు ఉన్నాయి. టాలీవుడ్ లో సూర్య కు ఉన్న మార్కెట్ దృష్ట్యా ఈ చిత్రాన్ని తెలుగులో కూడా రిలీజ్ చేసే అవకాశాలు ఉన్నాయి.