సూర్య చేతుల మీదుగా డైలాగ్ కింగ్ 'సన్ ఆఫ్ ఇండియా' టీజర్..!

కలెక్షన్ కింగ్ మంచు మోహన్ బాబు నటిస్తున్న తాజా చిత్రం ''సన్ ఆఫ్ ఇండియా''. వాస్తవిక సంఘటనల ఆధారంగా రూపుదిద్దుకొంటున్న ఈ సినిమాలో ఇదివ‌ర‌కెన్న‌డూ పోషించని అత్యంత ప‌వ‌ర్‌ ఫుల్ రోల్‌ లో మోహన్ బాబు కనిపించనున్నారు. ఇప్పటికే విడుదలైన ప్రచార చిత్రాలు విశేషంగా ఆకట్టుకున్నాయి. ఈ క్రమంలో సినిమాకు సంబంధించిన టీజర్ ను జూన్ 4న రిలీజ్ చేయబోతున్నట్లు ఇది వరకే ప్రకటించారు. అయితే కోలీవుడ్ స్టార్ హీరో సూర్య చేతుల మీదుగా ఈ నెల 4న మధ్యాహ్నం గం.12.20 నిమిషాలకు 'సన్ ఆఫ్ ఇండియా' టీజర్ విడుదల చేయబడుతున్నట్లు చిత్ర బృందం వెల్లడించింది.

సూర్య హీరోగా నటించిన 'ఆకాశం నీ హద్దురా' సినిమాలో మోహన్ బాబు కీలక పాత్రలో కనిపించిన సంగతి తెలిసిందే. ఈ సినిమా సమయంలో వీరి మధ్య మంచి అనుబంధం ఏర్పడింది. ఈ నేపథ్యంలోనే ఇప్పుడు డైలాగ్ కింగ్ నటిస్తున్న 'సన్ ఆఫ్ ఇండియా' సినిమాకు సూర్య తనవంతు సపోర్ట్ ఇస్తున్నాడు. ఇకపోతే 30 ఏళ్ల కిందట జూన్ 4న మోహన్‌ బాబు నటించిన ‘అసెంబ్లీ రౌడీ’ సినిమా విడుదలై ఘన విజయాన్ని సొంతం చేసుకుంది. ఆ ప్రత్యేకత వల్లే ‘సన్‌ ఆఫ్‌ ఇండియా’ టీజర్‌ ని అదే డేట్ కి రిలీజ్ చేయాలని మేకర్స్ నిర్ణయించినట్టు తెలుస్తోంది.

కాగా, ''సన్ ఆఫ్ ఇండియా'' చిత్రాన్ని 24 ఫ్రేమ్స్ ఫ్యాక్టరీ మరియు శ్రీ ల‌క్ష్మీ ప్ర‌స‌న్న పిక్చ‌ర్స్ బ్యానర్స్ పై మంచు విష్ణు నిర్మిస్తున్నాడు. రచయిత డైమండ్ ర‌త్న‌బాబు ఈ చిత్రానికి దర్శకత్వం వహిస్తుండగా.. మోహ‌న్‌ బాబు స్క్రీన్‌ ప్లే స‌మ‌కూరుస్తున్నారు. మేస్ట్రో ఇళ‌య‌రాజా సంగీత స్వ‌రాలు సమకూరుస్తున్నారు. స‌ర్వేష్ మురారి సినిమాటోగ్రఫీ అందిస్తున్నారు. ఇందులో మోహ‌న్‌ బాబుకు స్టైలిస్ట్‌ గా ఆయ‌న కోడ‌లు విరానికా మంచు వర్క్ చేస్తున్నారు. ఐదు వందల యాభైకి పైగా చిత్రాల్లో నటించి, ఎన్నో భిన్నమైన పాత్రలతో ప్రేక్షకుల మనసును గెలుచుకున్న మోహన్‌ బాబు.. ‘సన్‌ ఆఫ్‌ ఇండియా’ తో మరోసారి అన్ని వర్గాలను మెప్పిస్తారని చిత్రబృందం భావిస్తోంది.