అక్కినేని హీరోలు రేసులోకి దూసుకొస్తారా?

అఖిల్ అక్కినేని న‌టించిన అఖిల్ ఆడియో వేడుక అక్కినేని అభిమానుల‌కు బోలెడంత పండుగ‌ తెచ్చింది. అఖిల్ గ్రాండ్ లాంచ్ అదిరిపోయిందంటూ ప్ర‌శంస‌లొచ్చాయి. ఓ హీరోని ఈ రేంజులో లాంచ్ చేయ‌డం అసాధార‌ణం అంటూ ప్ర‌ముఖులంతా పొగిడేశారు. దేశ‌వ్యాప్తంగా ఉన్న సెల‌బ్రిటీల బైట్స్‌ తో ఏవీలు వేసి అఖిల్ స్టార్‌ డ‌మ్ అసాధార‌ణ‌మైన‌ది అని ప్రూవ్ చేశారు. అయితే అదే వేదిక మ‌రో ప్ర‌శ్న‌ను కూడా లేవ‌నెత్తింది.

అఖిల్ సంగ‌తి స‌రే... అక్కినేని ఫ్యామిలీలోనే మ‌రో ఇద్ద‌రు హీరోల స్టాట‌స్ ఏంటి? ఛ‌రిష్మా ఉండీ ఆ హీరోలు ఎందుకు రేసులో ముందుకు రాలేక‌పోతున్నారు? అన్న ప్ర‌శ్న‌లు అక్కినేని అభిమానుల్నే వేధించాయి. హీరో సుమంత్ ఆర‌డుగుల ఆజానుబాహుడు. స‌త్యం - గౌరి లాంటి హిట్ సినిమాలు కెరీర్‌ లో ఉన్నాయి. కానీ ఏం లాభం? అత‌డు త‌న బ్రాండ్‌ ని ప్ర‌మోట్ చేసుకోవ‌డంలో చ‌తికిల‌బ‌డ్డాడు. హీరోగా నిల‌దొక్కుకోలేక‌పోయాడు. అప్ప‌ట్లో సుమంత్ హీరోగా, స్వాతి నాయిక‌గా ఓ సినిమా మొద‌లై ఆగిపోయింది. ఆ త‌ర్వాత విక్కీడోన‌ర్ రీమేక్‌ లో అత‌డు న‌టిస్తాడ‌ని వార్త‌లొచ్చాయి. కానీ ఏదీ వ‌ర్క‌వుట్ కాలేదు.

అలాగే మ‌రో అక్కినేని హీరో సుశాంత్ ఓ ఇద్ద‌రు ద‌ర్శ‌కుల‌తో క‌థా చ‌ర్చ‌లు సాగించాడు. జి.నాగేశ్వ‌ర‌రెడ్డి - మేర్ల‌పాక ముర‌ళి క‌థ‌లు ఓకే అయ్యాయి. కానీ ప్రాజెక్టు ఏదీ ముందుకు వెళ్ల‌లేదు. ఆ ఇద్ద‌రు ద‌ర్శ‌కులు వేరే ప్రాజెక్టుల‌తో బిజీగా ఉన్నారిప్పుడు. అస‌లు ఈ ఇద్ద‌రి విష‌యంలో ఏం జ‌రుగుతోంది? అన్న‌దే అక్కినేని అభిమానుల సందిగ్ధం. మ‌రి దీనికి ధీటైన స‌మాధానం ఇస్తూ .. రేసులోకి దూసుకొస్తారా? లేదా? వెయిట్ అండ్ సీ.