హిట్టు కోసం ఏ ఛాన్స్ వదలట్లేదు

తెలుగు పరిశ్రమలో వారసులు చాలామంది సక్సెస్ అయ్యారు. ఆరంభంలో తడబడ్డా తర్వాత నిలదొక్కుకున్నారు. ఐతే ఎంత కష్టపడ్డా ఇంకా నిలబడలేకపోతున్న హీరోల్లో సుశాంత్ ఒకడు. నాగార్జున మేనల్లుడిగా ఇండస్ట్రీలోకి అడుగుపెట్టిన సుశాంత్.. ఇప్పటిదాకా మూడు సినిమాలు చేశాడు. ఆ మూడూ నిరాశనే మిగిల్చాయి. దీంతో సొంత బేనర్ దాటి బయటికి రాకుండా మరోసారి హిట్టు కోసం గట్టి ప్రయత్నం చేస్తున్నాడు సుశాంత్. ఆ సినిమానే ‘ఆటాడుకుందాం రా’. ఈసారి కామెడీ చిత్రాలతో వరుసగా హిట్లు కొడుతున్న నాగేశ్వరరెడ్డిని నమ్ముకున్నాడు సుశాంత్. చాన్నాళ్ల కిందటే సినిమా పూర్తయినా కొన్ని కారణాల వల్ల విడుదల వాయిదా పడుతూ వస్తోంది. ఐతే ఈ నెల్లోనే 19వ తారీఖున ఈ చిత్రాన్ని విడుదల చేసేయడానికి ఫిక్సయ్యాడు సుశాంత్.

అక్కినేని అభిమానుల్ని ఆకట్టుకోవడం కోసం ఈ సినిమాకు అనేక ఆకర్షణలు జోడిస్తున్నాడు సుశాంత్. తాతగారి పాట ‘పల్లెకు పోదాం..’ను రీమిక్స్ చేశాడు. పల్లెటూరిలోనే ఈ పాటను చిత్రీకరించి నాగేశ్వరరావును గుర్తుకు తెచ్చే ప్రయత్నం చేస్తున్నాడు. ఈ సినిమాలో సుశాంత్ నాగార్జున ‘సోగ్గాడే చిన్నినాయనా’ లుక్ ను కూడా ట్రై చేస్తున్నాడు. అచ్చంగా బంగార్రాజులాగా తయారై ఫొటో షూట్ కూడా చేశాడు. ఈ నెల 5న ‘ఆటాడుకుందాం రా’ ఆడియో విడుదల కానున్న నేపథ్యంలో ఈ ఫొటోలు కూడా రిలీజ్ చేశాడు. మొత్తానికి హిట్టు కోసం.. సినిమాకు ఆకర్షణ పెంచడం కోసం సుశాంత్ చాలానే చేస్తున్నాడు. ఈసారైనా అతడి ప్రయత్నం ఫలిస్తుందేమో చూద్దాం మరి.