ఆత్మ లేచొచ్చేలా సుశాంత్ చుట్టూ డ్ర‌గ్స్ ఉచ్చు...!

బాలీవుడ్ యంగ్ హీరో సుశాంత్ సింగ్ రాజ్ ‌పుత్ అనుమానాస్ప‌ద మృతి చుట్టూ ఎన్నెన్నో ట్విస్ట్ లు అనుమానాలు వెలుగు చూస్తున్నాయి. గ‌త కొన్ని రోజులుగా సుశాంత్ మ‌రణించిన తొలి రోజు నుంచే ట్విస్ట్ ల ప‌ర్వం మొద‌లైంది. సుశాంత్ కేసుని సీబీఐకి అప్ప‌గించ‌డంతో అస‌లు విచార‌ణ ఊపందుకుంది. ఈ కేసుకు సంబంధించిన చిక్కు ముడుల‌ను విప్ప‌డానికి రంగంలోకి దిగిన సీబీఐ సుశాంత్ కేసుతో సంబంధం వున్న వారిని ఒక్కొక్క‌రిగా విచారించ‌డం మొద‌లుపెట్టింది.

ఇందులో భాగంగా సుశాంత్ మాజీ మేనేజ‌ర్ శృతి మోడీని గురువారం సీబీఐ విచారించింది. ఈ సంద‌ర్భంగా ఆమె వెల్ల‌డించిన విషయాలు సంచ‌ల‌నం సృష్టిస్తున్నాయి. డ్రగ్స్ సుశాంత్ చుట్టూ వున్న‌ సంస్కృతిలో భాగంగా క‌లిసిపోయాయని స్ప‌ష్టం చేయ‌డం ఆస‌క్తిక‌రంగా మారింది. రియా చ‌క్ర‌వ‌ర్తి ఆమె ఏర్పాటు చేసిన స్టాఫ్ బ‌ల‌వంతంగా డ్ర‌గ్స్ ని సుశాంత్ జీవితంలో ఓ భాగం చేశార‌ని సంచ‌ల‌న విష‌యాన్ని బ‌య‌ట‌పెట్టింది. త‌ను 2019 వ‌ర‌కు సుశాంత్ కు మేనేజ‌ర్‌గా వున్నాన‌ని ఆ త‌రువాతే త‌న స్థానంలోకి దిషా సాలియ‌న్ వ‌చ్చింద‌ని పేర్కొంది.

శృతి మోడీ తాజా విచార‌ణ‌లో ఊహించ‌ని విష‌యాల్ని వెల్ల‌డించ‌డంతో రియా చుట్టూ సీబీఐ- ఎన్‌సీబీ- ఈడీ వుచ్చు బిగుస్తోంది. ఈ విష‌యాలు విన్న బాలీవుడ్ వ‌ర్గాలు నోరెళ్ల‌బెడుతున్నారు. అయితే రియాను బ‌లిప‌శువును చేస్తారా లేక ఆ వెన‌క ఉన్న షాడోస్ ని క‌ట‌క‌టాల వెన‌క్కి గుంజుకెళ‌తారా? అన్న‌దానికి కాల‌మే స‌మాధానం ఇవ్వాల్సి ఉంటుంది. సుశాంత్ వెన‌క ఇంత జ‌రిగిందా? అని అంతా అవాక్క‌వుతున్నా.. సీబీఐ అస‌లు నిజాల్ని నిగ్గు తేల్చాల్సి ఉంటుంది. రియా ప్ర‌స్తుతానికి ఆరోప‌ణ‌లు ఎదుర్కొంటున్న‌ దోషి మాత్ర‌మే.