రాంగ్ ట్రాక్ లో వెళ్లానని ఒప్పేసుకున్న హీరో

తప్పులు చేయటం అందరూ చేస్తారు. దీనికి ఎవరూ మినహాయింపు కాదు.కానీ.. చేసిన తప్పును అందరి ముందు ఒప్పుకునే గట్స్ చాలా తక్కువ ఉంటాయి. అందులోని సినిమా ఇండస్ట్రీలో పేరున్న కుటుంబం నుంచి వచ్చి.. సక్సెస్ అంతగా లేని ఒక హీరో.. తన తప్పుల్ని ఒప్పుకోవటం.. అది కూడా అందరి ముందు అంటే అందుకు చాలానే గుండె ధైర్యం కావాలి. తాజాగా చెప్పిన మాటలతో తనకు ధైర్యం విషయంలో మాత్రం టన్నుల కొద్దీ ఉందన్న మాటను చెప్పకనే చెప్పేశారని చెప్పాలి.

టాలీవుడ్ లో ఉన్న హీరోల్లో సుశాంత్ కాస్త భిన్నమని చెప్పాలి. ఆయన తీరు మిగిలిన వారి మాదిరి ఉండదు. అతను చేసిన సినిమాల్లో పెద్దగా ఆడింది లేదు. అలా అని తీసిపారేయటానికి లేదు. సినిమాల ఎంపికలో అతగాడి తప్పులు కొట్టొచ్చినట్లు కనిపిస్తుంటాయి. ఆ మధ్యన చేసిన చిలాసౌ.. ఆ తర్వాత చేసిన అల వైకుంఠపురములో.. సినిమాలు కాస్త భిన్నమనిచెప్పాలి.

తాజాగా అతగాడు హీరోగా ఇచట వాహనమలు నిలుపురాదన్న టైటిల్ తో ఒక సినిమా ఈ వారం విడుదల కానుంది. ఈ సినిమా మీద ఆసక్తి వ్యక్తమవుతోంది. డిఫరెంట్ కథతో ముందుకు వస్తున్నట్లు చెబుతున్న ఈ మూవీ సుశాంత్ ను ఎక్కడికి తీసుకెళుతుందన్నది ఆసక్తికరంగా మారింది. ఈ సినిమాకు సంబంధించిన ఒక కార్యక్రమాన్ని ఏర్పాటు చేసిన వేళ.. అందులో సుశాంత్ మాట్లాడి అందరి మనసుల్నిదోచేశారు.

ఎందుకంటే.. తాను చేసిన తప్పుల్ని ఓపెన్ గా ఒప్పేసుకున్నాడు. దర్శకులు త్రివిక్రమ్ చెప్పినప్పుడు కెరీర్ స్టార్టింగ్ లో కష్టపడాలని తెలుసు కానీ క్లారిటీ లేదన్నారు. ఏ డైరెక్షన్ లో ముందుకు వెళ్లాలో మొదట్లో అర్థం కాలేదని.. రాంగ్ ఇన్ ఫ్లుయెన్స్ లో పడి పోయినట్లు చెప్పారు. ఇది తన తప్పేనని ఒప్పేసుకున్నారు. ఇంతలా ఒప్పేసుకోవటం అందరికి సాధ్యం కాకపోవచ్చు. ఈ విషయంలో మిగిలిన వారికి తాను భిన్నమన్న విషయాన్ని సుశాంత్ చేతల్లో చేసి చూపించారని చెప్పాలి. మరి.. అతగాడి కొత్త సినిమాకు ఆల్ ద బెస్టు చెప్పేద్దామా?