గోవాలో 'సర్కారు వారి పాట' ఇంటెన్స్ ఫైట్..!

సూపర్ స్టార్ మహేష్ బాబు నటిస్తున్న లేటెస్ట్ యాక్షన్ ఎంటర్టైనర్ ''సర్కారు వారి పాట''. డైరెక్టర్ పరశురామ్ పెట్లా ప్రతిష్టాత్మకంగా తెరకెక్కిస్తున్న ఈ చిత్రంలో కీర్తి సురేష్ హీరోయిన్ గా నటిస్తోంది. ఇప్పటికే దుబాయ్ - హైదరాబాద్ లలో భారీ షెడ్యూల్స్ పూర్తి చేసిన చిత్ర బృందం.. తాజా షెడ్యూల్ షూటింగ్ కోసం గోవా పయనమయ్యారు.

గోవా లో ఇంటెన్స్ ఫైట్ తో ఈరోజు (ఆగస్టు 13) నుంచి తాజా షెడ్యూల్ చిత్రీకరణ మొదలైంది. ఫైట్ మాస్టర్స్ ద్వయం రామ్-లక్ష్మణ్ నేతృత్వంలో ఈ యాక్షన్ సీక్వెన్స్ షూట్ జరుగుతోంది. ఈ విషయాన్ని వెల్లడించిన మేకర్స్.. లొకేషన్ లోని ఓ ఫోటోని సోషల్ మీడియా మాధ్యమాలలో షేర్ చేశారు.

ఇందులో దర్శకుడు పరశురామ్ సన్నివేశం గురించి వివరిస్తుండగా.. మహేష్ బాబు ఆసక్తిగా వింటూ ఉన్నారు. ఈ ఫొటోలో రామ్-లక్ష్మణ్ ఫైట్ మాస్టర్స్ ని కూడా చూడొచ్చు. ఇకపోతే మహేష్ బర్త్ డే స్పెషల్ గా విడుదల చేసిన 'సర్కారు వారి పాట' బ్లాస్టర్ విశేష స్పందన తెచ్చుకుని యూట్యూబ్ లో రికార్డులు క్రియేట్ చేస్తోంది.

టాలీవుడ్ లో 24 గంటల్లో అత్యధిక వ్యూస్ తెచ్చుకున్న టీజర్ గా ఈ బ్లాస్టర్ ఆల్ టైం రికార్డ్ నమోదు చేసింది. ఇప్పటి వరకు 31 మిలియన్ల వ్యూస్ తో ట్రెండింగ్ లో కొనసాగుతోంది. ఇందులో స్టైలిష్ అండ్ ఎనర్జిటిక్ మహేష్ బాబు స్క్రీన్ ప్రెజన్స్ - ట్రేడ్ మార్క్ డైలాగ్ డెలివరీ వింటేజ్ సూపర్ స్టార్ ని గుర్తు చేశాయని చెప్పవచ్చు. సంక్రాంతి కానుకగా 2022 జనవరి 13న ఈ సినిమా విడుదల కానుంది.

'సర్కారు వారి పాట' చిత్రాన్ని మైత్రీ మూవీ మేకర్స్ - GMB ఎంటర్‌టైన్‌మెంట్ మరియు 14 రీల్స్ ప్లస్ సంస్థలు సంయుక్తంగా నిర్మిస్తున్నాయి. నవీన్ యెర్నేని - వై.రవిశంకర్ - రామ్ ఆచంట మరియు గోపీచంద్ ఆచంట నిర్మాతలుగా వ్యవహరిస్తున్నారు. ఎస్.ఎస్. థమన్ ఈ చిత్రానికి సంగీతం సమకూరుస్తున్నారు. ఏఎస్ ప్రకాష్ ఆర్ట్ డైరెక్టర్ గా ఉన్నారు. ఆర్. మది సినిమాటోగ్రఫీ అందిస్తుండగా.. మార్తాండ్ కె వెంకటేష్ ఎడిటింగ్ వర్క్ చేస్తున్నారు.