ఆసక్తికరంగా ఉన్న హార‌ర్ డ్రామా 'మ‌సూద‌' టైటిల్ పోస్టర్..!

'మ‌ళ్లీ రావా' 'ఏజెంట్ సాయిశ్రీ‌నివాస ఆత్రేయ' లాంటి రెండు క‌మ‌ర్షియ‌ల్ హిట్ సినిమాలను అందించిన స్వ‌ధ‌ర్మ్ ఎంట‌ర్‌టైన్‌మెంట్ బ్యానర్ లో ఇప్పుడు మూడో చిత్రం రాబోతోంది. మునుప‌టి రెండు సినిమాల త‌ర‌హాలోనే కంటెంట్ రిచ్ ఫిల్మ్‌ గా తెరకెక్కుతున్న ఈ చిత్రానికి 'మ‌సూద‌' అనే టైటిల్ ఖ‌రారు చేశారు. 'మ‌ళ్లీ రావా' చిత్రంతో గౌత‌మ్ తిన్న‌నూరి.. 'ఏజెంట్ సాయిశ్రీ‌నివాస ఆత్రేయ' చిత్రంతో స్వ‌రూప్‌ ఆర్‌.ఎస్‌.జె. లాంటి ఇద్ద‌రు ప్ర‌తిభావంతులైన‌ డైరెక్ట‌ర్లను ఇండస్ట్రీకి ప‌రిచ‌యం చేసిన స్వ‌ధ‌ర్మ్ ఎంట‌ర్‌టైన్‌మెంట్.. ఇప్పుడు 'మ‌సూద‌' మూవీతో సాయికిర‌ణ్‌ అనే దర్శకుడిని ప‌రిచ‌యం చేస్తోంది.

హార‌ర్ డ్రామాగా రూపొందుతున్న‌ ఈ చిత్రంలో 'జార్జిరెడ్డి' ఫేమ్ తిరువీర్ హీరోగా నటిస్తుండగా.. 'గంగోత్రి'లో బాల‌న‌టిగా అల‌రించిన కావ్య క‌ల్యాణ్‌ రామ్ హీరోయిన్‌ గా పరిచయం అవుతోంది. నటి సంగీత ముఖ్య‌మైన పాత్ర‌లో కనిపించనున్నారు. కాగా, ప‌దిహేడు సంవ‌త్స‌రాల త‌న కూతురు అనూహ్యంగా ప్ర‌వ‌ర్తిస్తుండ‌టంతో ఆందోళ‌న చెందిన ఒక ఒంట‌రి త‌ల్లి, అతి భ‌య‌స్తుడైన ప‌క్కింటి యువ‌కుడి స‌హాయంతో కూతుర్ని ఎలా కాపాడుకుంద‌నేది 'మసూద' చిత్రంలోని ప్రధానాంశం. 'మ‌సూద' అనే టైటిల్ ఆస‌క్తిక‌రంగా అనిపించడంతో పాటు తాజాగా విడుదల చేసిన పోస్ట‌ర్ అంద‌రి దృష్టినీ ఆక‌ర్షిస్తోంది. స్వ‌ధ‌ర్మ్ ఎంట‌ర్‌టైన్‌మెంట్ బ్యానర్ పై రాహుల్ యాద‌వ్ న‌క్కా నిర్మిస్తోన్న ఈ చిత్రానికి ప్ర‌శాంత్ ఆర్‌. విహారి సంగీతం సమకూరుస్తున్నారు. న‌గేష్ బానెల్ సినిమాటోగ్రాఫ‌ర్‌ గా వర్క్ చేస్తున్నారు. ఈ చిత్రానికి సంబంధించిన ఇతర వివరాలు త్వరలోనే వెల్లడికానున్నాయి.