ఆసక్తి రేపుతున్న నిఖిల్ శ్వాస!

కెరీర్ ప్రారంభం నుంచి రెగ్యులర్ ఫార్మాట్ లో కాకుండా కాస్త విభిన్నంగా అనిపించే కాన్సెప్ట్స్ తో దూసుకుపోతున్న హీరో నిఖిల్ కొత్త సినిమా ముద్ర షూటింగ్ ఫినిషింగ్ స్టేజిలో ఉన్న సంగతి తెలిసిందే. ఇన్వెస్టిగేటివ్ జర్నలిస్టుగా ఒక బర్నింగ్ ఇష్యూ మీద పోరాడే పాత్రలో నిఖిల్ ని దర్శకుడు సంతోష్ చాలా కొత్తగా చూపించబోతున్నట్టు ఇప్పటికే టాక్ ఉంది. ఇదిలా ఉంచితే నిఖిల్ చేస్తున్న మరో సినిమా శ్వాస రెగ్యులర్ షూటింగ్ కు వెళ్ళడానికి ముందే ఆసక్తి రేపుతోంది.

నివేదా థామస్ హీరోయిన్ గా నటిస్తున్న ఈ మూవీ ద్వారా కిషెన్ కట్టా దర్శకుడిగా పరిచయం అవుతున్నాడు. కాన్సెప్ట్ పోస్టర్ తో విడుదల చేసిన టీజర్ లో కొన్ని క్లూస్ ఉన్నప్పటికీ కథ దేని గురించా అనే అంచనాకు రాలేక ప్రేక్షకులు దీని కోసం ఎదురు చూసేలా ఉంది. విశాలమైన హై వే రోడ్డు మీద నిఖిల్ నివేదాలు ఇద్దరు ట్రెక్కింగ్ సామాను మోసుకుంటూ రాత్రి వేళ కళ్ళు మిరుమిట్లు గొలిపే నక్షత్ర కాంతులు దారి చూపిస్తుండగా టార్చ్ లైట్ పట్టుకున్న నిఖిల్ ఆకాశం లోని ఓ స్టార్ వైపుగా టార్చ్ వేసి ఏదో చెప్పడం చూస్తే ఇందులో చాలా విషయమే ఉన్నట్టు అనిపిస్తోంది. రొమాంటిక్ థ్రిల్లర్ గా చెప్పబడుతున్న శ్వాసను ఈ రోజు లాంఛ్ చేయబోతున్నారు.

కథల విషయం ఏ మాత్రం మూసకు అవకాశం ఇవ్వకుండా ఎంచుకుంటున్న నిఖిల్ శ్వాస విషయంలోనూ అదే జాగ్రత్త తీసుకున్నట్టు కనిపిస్తోంది. ఇస్త్వాన్ లెగన్ ఛాయాగ్రహణం అందిస్తున్న శ్వాస ద్వారా తేజ్ ఉప్పలపాటి హరిణికేష్ రెడ్డి నిర్మాతలుగా మొదటి ప్రయత్నం చేస్తున్నారు. ముద్ర-శ్వాస ఇలా వినూత్నమైన కాన్సెప్ట్స్ తో ముందుకెళుతున్న నిఖిల్ తన రూట్ సెపరేటని చెప్పకనే చెబుతున్నాడు