'శ్వాసలో' ప్రోమో: హృదయంలో ప్రేమ జ్వాలలు రగిల్చే 'కొండ పొలం' పాట..!

క్రియేటివ్ డైరెక్టర్ క్రిష్ జాగర్లమూడి దర్శకత్వంలో తెరకెక్కిన ''కొండ పొలం'' చిత్రాన్ని అక్టోబర్ 8న ప్రేక్షకుల ముందుకు తీసుకురానున్నారు. అదే పేరుతో సన్నపురెడ్డి వెంకట రామిరెడ్డి రాసిన నవల ఆధారంగా ఈ సినిమా రూపొందుతోంది. అటవీ నేపథ్యంలో సాగే ఈ గ్రామీణ అడ్వెంచర్ మూవీలో మెగా మేనల్లుడు పంజా వైష్ణవ్ తేజ్ - స్టార్ హీరోయిన్ రకుల్ ప్రీత్ సింగ్ జంటగా నటించారు. విడుదల తేదీ దగ్గర పడుతుండటంతో మేకర్స్ ప్రమోషన్స్ స్పీడ్ పెంచారు.

ఇప్పటికే విడుదలైన 'కొండ పొలం' ఫస్ట్ లుక్ మరియు 'ఓబులమ్మ' పాటలకు మంచి స్పందన లభించింది. ఇటీవల వచ్చిన థియేట్రికల్ ట్రైలర్ సినిమాపై అంచనాలు పెంచేసింది. ఈ క్రమంలో మరో సాంగ్ ను వీక్షకులకు అందించడానికి చిత్ర బృందం రెడీ అయ్యింది. హృదయంలో ప్రేమ జ్వాలలను రగిల్చే ''శ్వాసలో'' అనే పాటను రిలీజ్ చేస్తున్నట్లు తెలుపుతూ ప్రోమోని వదిలారు. 'శ్వాసలో హద్దుల్ని దాటాలన్న ఆశ..' అంటూ సాగిన ఈ పాట విజువల్ ట్రీట్ లా అనిపిస్తుంది. పూర్తి సాంగ్ కోసం ఆతృతగా ఎదురు చూసేలా చేస్తోంది.

కీరవాణి స్వరాలు సమకూర్చిన ఈ బ్యూటిఫుల్ మెలోడీ గీతాన్ని యువ గాయకుడు పీవీఎన్ఎస్ రోహిత్ ఆలపించారు. సినిమాటోగ్రాఫర్ జ్ఞాన శేఖర్ వీఎస్ ఈ పాటను అద్భుతంగా చూపించారు. రాజ్ కుమార్ గిబ్సన్ ఆర్ట్ డైరెక్టర్ గా.. శ్రవణ్ కటికనేని ఎడిటర్ గా వర్క్ చేశారు. 'శ్వాసలో' పాట పూర్తి లిరికల్ వీడియోని రేపు గురువారం సాయంత్రం 4. 45 గంటలకు విడుదల చేయనున్నారు.

'కొండ పొలం' చిత్రాన్ని బిబో శ్రీనివాస్ సమర్పణలో ఫస్ట్ ఫ్రేమ్ ఎంటర్టైన్మెంట్స్ బ్యానర్ పై సాయిబాబు జాగర్లమూడి - రాజీవ్ రెడ్డి సంయుక్తంగా నిర్మిస్తున్నారు. ఇందులో వైష్ణవ్ తేజ్ - రకుల్ ప్రీత్ సింగ్ గొర్రెల కాపరులుగా కనిపించనున్నారు. సాయి చంద్ - కోట శ్రీనివాసరావు - నాజర్ - అన్నపూర్ణ - హేమ - ఆంథోనీ - రవి ప్రకాష్ - రచ్చ రవి - మహేష్ విట్టా - ఆనంద్ విహారి తదితరులు ఈ చిత్రంలో ఇతర పాత్రలు పోషించారు.