బాబుల కోసం స్వాతి కష్టపడుతోంది

టాలీవుడ్ బుల్లి తెర నుంచి సిల్వర్ స్క్రీన్ వరకు వచ్చిన వారిలో కలర్స్ స్వాతి అని అందరికి తెలిసిన విషయమే. తెలుగు హీరోయిన్ అయినా ఇతర భాషల్లో కూడా సినిమాలను బాగానే చేసింది. ఇక తెలుగులో కుర్ర హీరోతో కొన్ని సినిమాల్లో నటించినా పరభాషా నటీనటుల గ్లామర్ షోలు అలాగే నార్త్ భామల డామినేషన్ ఎక్కువైపోవడంతో స్వాతి పెద్దగా అవకాశాలు దక్కించుకోలేదు. పైగా అవకాశాల కోసం గ్లామర్ గీతను కూడా ఎప్పుడు దాటలేదు. కేవలం తనకి వచ్చిన అవకాశాల్లో మంచి సినిమాలను ఎంచుకుంటూ..కెరీర్ ను అలా నెట్టుకొస్తోంది.

ప్రస్తుతం స్వాతి తన లేటెస్ట్ మూవీ ప్రమోషన్స్ లో చాలా బిజీగా ఉంది. లండన్ బాబులు అనే సినిమా ప్రమోషన్ కోసం స్వాతి వైజాగ్ లోని కాలేజీలను చుట్టేస్తోంది. రోజుకొక కాలేజ్ ని ఎంచుకొని చిత్ర యూనిట్ తో ప్రమోషన్స్ ని తనదైన శైలిలో చేస్తోందట. అమ్మడికి మాటలతో ఆకట్టుకోవడం కొత్తేమి కాదు. అయితే కొత్త బాబు అయిన హీరోను.. హిట్టు కోసం పరితపిస్తున్న దర్శకుడిని.. అలాగే నిర్మాత మారుతి బాబును నిలబెట్టాలంటే.. ఈ సినిమాకు స్వాతి ప్రమోషన్లే కీలకం. దానికి తగ్గట్లు స్వాతి కూడా వీరికోసం బాగానే కష్టపడుతోంది.

ఇక లండన్ బాబులు సినిమా విషయనికి వస్తే..తమిళ్ ఆండవన్ కట్టలాయ్ సినిమాకి రీమేక్ గా వస్తోంది. మారుతి నిర్మినించిన ఈ సినిమాకు బి.చిన్నికృష్ణ దర్శకత్వం వహించాడు. అయితే సినిమాను చిత్ర యూనిట్ త్వరలో రిలీజ్ చేయలనుకుంటోంది. స్వాతి తో పాటు రక్షిత్ - ప్రియదర్శి అలాగే కమెడియన్ ధన్ రాజ్ కూడా సినిమాలో నటిస్తున్నారు. ప్రస్తుతం అందరు కలిసి సినిమాకు ప్రమోషన్ చేస్తున్నారు. మరి ఎంత వరకు సినిమా ఆకట్టుకుంటుందో చూడాలి.