సైలెంట్‌ గా క‌ల‌ర్స్ స్వాతి రీఎంట్రీ

క‌ల‌ర్స్ స్వాతి.. ప‌రిచ‌యం అవ‌స‌రం లేని పేరు ఇది. తెలుగు-త‌మిళం-మ‌ల‌యాళంలో ప‌లు క్రేజీ చిత్రాల్లో నటించిన స్వాతి త‌న చిన్న‌నాటి స్నేహితుడు.. పైలెట్ వికాస్ ని పెళ్లాడి విదేశాల్లో సెటిలైన సంగ‌తి తెలిసిందే. పెళ్లి త‌ర్వాత స్వాతి సినిమాల్లోకి రీఎంట్రీ ఇస్తుందా? అన్న సందిగ్ధ‌త అప్ప‌ట్లో వ్య‌క్త‌మైంది. అభిమానుల‌కు ఇప్ప‌టికీ ఆ సందేహం అలానే ఉంది.

అయితే దానికి తాజాగా స్వాతి నుంచి స‌మాధానం వ‌చ్చేసింది. స్వాతి తిరిగి సినిమాల్లోకి రీఎంట్రీ ఇస్తోంది. అయితే అది టాలీవుడ్ లో కాదు.. మాలీవుడ్ లో పున‌రారంగేట్రం చేస్తోంది. స్వాతి రీఎంట్రీ ఇస్తున్న ఈ సినిమా టైటిల్ `త్రిస్సూర్ పూర‌మ్‌`. జ‌య‌సూర్య క‌థానాయ‌కుడు. రాజేష్ మోహ‌న‌న్ ద‌ర్శ‌క‌త్వం వ‌హిస్తున్నారు. ఈ చిత్రంలో లీడ్ పెయిర్ భార్యాభ‌ర్త‌లుగా న‌టించ‌నున్నారు. పెళ్లి త‌ర్వాత స్వాతి లుక్ పూర్తిగా మారిపోయింది. ఇప్పుడు మ‌రింత ప‌రిణ‌తితో క‌నిపిస్తోంది కాబ‌ట్టి అందుకు త‌గ్గ పాత్ర‌నే ఎంచుకుంద‌ట‌.

ఇక స్వాతి మ‌ల‌యాళ ప‌రిశ్ర‌మ‌కు కొత్తేమీ కాదు. ఇప్ప‌టికే అక్క‌డ‌ ప‌లువురు స్టార్ల స‌ర‌స‌న క్రేజీ చిత్రాల్లో న‌టించి మెప్పించింది. ఇదివ‌ర‌కూ జ‌య‌సూర్య‌- స్వాతి జంట‌గా `ఆడు` అనే సినిమా వ‌చ్చింది. అందులో జ‌య‌సూర్య షాజి పాప్ప‌న్ అనే యువ‌కుడి పాత్ర‌లో న‌టించ‌గా స్వాతి అత‌డి గాళ్ ఫ్రెండ్ పింకీగా న‌టించింది. మ‌రోసారి సేమ్ జోడీ రిపీట‌వుతుండ‌డం ఆస‌క్తిని పెంచుతోంది. త్రిస్పూర్-ఎర్నాకులం- హైద‌రాబాద్- కోయంబ‌త్తూర్ లో ఈ చిత్రాన్ని తెర‌కెక్కించ‌నున్నారు. ఎంతో డీసెంట్ గా ఎలాంటి హ‌డావుడి లేకుండా ఇలా మాలీవుడ్ సినిమాతో రీఎంట్రీ ఇవ్వ‌డ‌మేంటా? అంటూ అభిమానుల్లో ఒక‌టే క‌న్ఫ్యూజ‌న్ నెల‌కొంది. ఎలానూ రీఎంట్రీ ఇస్తోంది కాబ‌ట్టి తెలుగులోనూ స‌రైన ఆఫ‌ర్ వ‌స్తే న‌టిస్తుందేమో చూడాలి.