ఫ్యామిలీ మేన్ 2 టీం పార్టీ చేసుకునే స్వీట్ న్యూస్..

మోస్ట్ ఎవైటింగ్ వెబ్ సిరీస్ గా గుర్తింపు పొందటమే కాదు.. విడుదలైన వెంటనే రికార్డుల్ని తిరగరాసేస్తూ ఒకవైపు.. వివాదాల్లో నలుగుతూ మరో వైపు.. మొత్తంగా అరుదైన విజయాన్ని సొంతం చేసుకుంది ఫ్యామిలీ మేన్ 2. సున్నితమైన సబ్జెక్టును తీసుకొని దాన్ని సమర్థంగా డీల్ చేయటం వల్లే.. అన్ని వివాదాల నుంచి తప్పించుకోగలిగింది. విమర్శకుల ప్రశంసలు పొందటమే కాదు.. దీన్ని రూపొందించేందుకు పడిన శ్రమ ఈ సిరీస్ ను చూసినోళ్లకు ఇట్టే అర్థమవుతుంది.

ఇప్పటికే భారీ సక్సెస్ ను ఎంజాయ్ చేస్తోంది ఫ్యామిలీ మేన్ 2 టీం. ఇలాంటివేళ.. వారికి మరింత కిక్ ఎక్కించే న్యూస్ వచ్చింది. తాజాగా ఐఎండీబీ విడుదల చేసిన జాబితాలో టాప్ ఫోర్ గా ఫ్యామిలీ మేన్ 2 నిలిచింది. అరుదైన ఈ ఘనతను సాధించిన మొదటి భారత వెబ్ సిరీస్ గా చెప్పాలి.
ప్రపంచ వ్యాప్తంగా అత్యుత్తమ.. విశేష ప్రజాదరణ పొందిన వెబ్ సిరీస్ లను ఐఎండీబీ గుర్తిస్తుంది. మోస్ట్ పాపులర్ షోస్ ఇన్ ది వరల్డ్ జాబితాలో ఫ్యామిలీ మేన్ 2 నిలిచింది. నాలుగో స్థానంలో ఉన్న ఈ సిరీస్ కు ముందున్న వెబ్ సిరీస్ లను చూస్తే.. హాలీవుడ్ కు చెందిన ‘‘లోకి’’ తొలి స్థానంలో నిలవగా.. రెండో స్థానంలో ‘‘స్వీట్ టూత్’’.. మూడో స్థానంలో ‘‘మేర్ ఆఫ్ ఈస్ట్ టౌన్’’ నిలిచాయి.

యూజర్ ఓట్ల ఆధారంగా ప్రతి ఏడాది ఈ జాబితాను సిద్ధం చేస్తారు. ఇప్పటివరకు మరే ఇతర ఇండియన్ వెబ్ సిరీస్ కూడా ఈ టాప్ చార్ట్ లో చోటు దక్కలేదు. తాజా ఘనతపై మనోజ్ బాజ్ పేయ్ సంతోషాన్ని వ్యక్తం చేశారు. ఫ్యామిలీ మేన్ మొదటి సీరిస్ కంటే కూడా రెండో సిరీస్ అద్భుత విజయాన్ని సాధించింది. తాజాగా మూడో సిరీస్ కోసం కసరత్తులు మొదలయ్యాయి. త్వరలోనే దీని షూట్ మొదలయ్యే అవకాశం ఉందని చెబుతున్నారు.