సైరా వీడియో: మేకింగ్ భళిరా!

గత ఏడాది చిరంజీవి పుట్టినరోజు సందర్భంగా వదిలిన చిన్న టీజర్ ఆ తర్వాత ఆర్టిస్టుల ఒకటి రెండు పోస్టర్లు తప్ప ప్రమోషన్ విషయంలో పెద్దగా యాక్టివ్ గా లేని సైరా నరసింహారెడ్డి టీమ్ ఈ రోజు నుంచి జూలు విదిల్చింది. మెగా ఫ్యాన్స్ కు నిన్నటి నుంచే 14న మేకింగ్ వీడియో రిలీజ్ చేయబోతున్నట్టు హింట్ ఇచ్చేసింది కాబట్టి దానికి తగ్గట్టే అభిమానులు ఎప్పుడెప్పుడు మెగాస్టార్ ని కొత్త లుక్ లో చూద్దామా అని ఎదురు చూడటం మొదలుపెట్టారు. వాళ్ళ ఆకాంక్షలను నిలబెట్టుకుంటూ కొణిదెల ప్రొడక్షన్ కంపెనీ 1 నిముషం 47 సెకండ్లు ఉన్న మేకింగ్ వీడియోని ఆన్ లైన్ లో రిలీజ్ చేసింది. అందులో ఏముందో ఓ లుక్ వేద్దాం

వరల్డ్ అఫ్ సైరా పేరుతో కోట సెట్ వేయడం మొదలుకుని టీమ్ లో ఉన్న ప్రతిఒక్కరు ఎలాంటి డెడికేషన్ తో సినిమా కోసం వర్క్ చేశారో వీడియోలో చూపించిన తీరు అబ్బురపరిచేలా ఉంది. గ్రెగ్ పావెల్ రామ్ లక్ష్మణ్ లు కంపోజ్ చేసిన ఫైట్లు రోమాలు నిక్కబొడుచుకునేలా ఉన్నాయనే తరహాలో అనిపించగా ఇంతకు ముందెన్నడూ చూడని హై వోల్టేజ్ సీన్స్ ఇందులో చూస్తారని మరో స్టంట్ మాస్టర్ లీ విట్టేకర్ చెప్పడం అభిమానుల ఉత్సాహాన్ని రెట్టింపు చేసేలా ఉంది. సినిమాలోని కీలక పాత్రలు అమితాబ్ బచ్చన్ - కిచ్చ సుదీప్ - విజయ్ సేతుపతి - నయనతార - తమన్నా - జగపతి బాబు - రవి కిషన్ ల లుక్స్ ని కట్ చేసి చూపించిన తీరు బాగుంది.

అసలైన చిరంజీవి లుక్ మాత్రం చివరిలో ఓ అద్దంలో చూపించి ఆ తర్వాత బ్రిటిష్ సైనికులను ఊచకోత కొస్తుండగా సింగల్ షాట్ లో చూపించి ఫ్యాన్స్ ఉద్విగ్నతను టీజర్ కోసం దాచి ఉంచేశారు. ఈ నెల 20న టీజర్ విడుదల చేయబోతున్నట్టు ఇందులోనే ప్రకటించారు. విజువల్స్ లో టెక్నీకల్ టీమ్ తో పాటు సుస్మిత రామ్ చరణ్ సురేందర్ రెడ్డి అందరిని వర్క్ ప్లేస్ లో చూపించిన వైనం ఆకట్టుకునేలా ఉంది. మేకింగ్ వీడియోలోనే ఈ రేంజ్ గూస్ బంప్స్ ఇస్తుంటే ఇక టీజర్ ట్రైలర్లు ఏ రేంజ్ లో ఉంటాయో వేరే చెప్పాలా.