సైరా పాన్ ఇండియా.. మెగా ప్ర‌మోష‌న్ ఏది?

మెగాస్టార్ చిరంజీవి డ్రీమ్ ప్రాజెక్ట్ `సైరా న‌ర‌సింహారెడ్డి`. ఉయ్యాలవాడ న‌ర‌సింహారెడ్డి జీవిత క‌థ ఆధారంగా తెర‌కెక్కించిన ఈ చిత్రం గాంధీ జ‌యంతి సంద‌ర్భంగా అక్టోబ‌ర్ 2న విడుద‌ల కాబోతోంది. ఇంకా రిలీజ్‌ కు ఏడు రోజులే మిగిలింది. ఈ స‌మ‌యంలో మెగా కాంపౌండ్ ఎలాంటి హ‌డావిడీ చేయ‌క‌పోవ‌డం ప‌లువురు విశ్లేష‌కుల్ని... ప‌రిశ్ర‌మ వ‌ర్గాల్ని ఆశ్చ‌ర్యానికి గురిచేస్తోంది. టీజ‌ర్‌- ట్రైల‌ర్ రిలీజ్ త‌రువాత ఈ సినిమాపై భారీ అంచ‌నాలు ఏర్ప‌డ్డాయి. పాన్ ఇండియా స్థాయిలో రిలీజ్ కు ముస్తాబ‌వుతున్న ఈ చిత్ర ప్ర‌చారం మాత్రం ఆ స్థాయిలో చేయ‌డం లేదు. ఇత‌ర రాష్ట్రాల్లో ప్ర‌మోష‌న్ ఇప్ప‌టికీ మొద‌లు పెట్ట‌క‌పోవ‌డం ఆశ్చ‌ర్యం క‌లిగిస్తోంది.

ప్ర‌భాస్ న‌టించిన `సాహో` చిత్రానికి టీమ్ అంతా నెల ముందే ఇత‌ర రాష్ట్రాల్లో ప్ర‌మోష‌న్ కోసం వెళ్లింది. ప్ర‌త్యేకంగా ప్ర‌చారం కోసం చిత్ర బృందం హెలీక్యాప్ట‌ర్స్ ని వాడి మ‌రీ ప్ర‌చారం అద‌ర‌గొట్టారు. ఆ టీమ్ తో పోలిస్తే `సైరా` విష‌యంలో మెగా కాంపౌండ్ చాలా వెన‌క‌బ‌డి వుంద‌ని అర్థ‌మ‌వుతోంది. ఈ సినిమా తెలుగు-త‌మిళ భాష‌ల‌తో పాటు మ‌ల‌యాళ‌- హిందీ భాష‌ల్లోనూ విడుద‌ల కాబోతోంది. అయితే తెలుగులో త‌ప్ప ఇప్ప‌టికీ ఇత‌ర భాష‌ల్లో చిత్ర బృందం ప్ర‌మోష‌న్స్ ని మొద‌లు పెట్ట‌లేదు. హీరోయిన్స్ కానీ.. ద‌ర్శ‌కుడు... నిర్మాత‌.. ఇత‌ర కీల‌క పాత్ర ధారులు అస‌లు ప్ర‌చార బ‌రిలోకి దిగ‌లేదు. ఆ హ‌డావిడే ఎక్క‌డా క‌నిపించ‌డం లేదు. బాలీవుడ్‌లో ఫ‌ర్హాన్ అక్త‌ర్ రిలీజ్ చేస్తున్నా అక్క‌డ కూడా ప్ర‌మోష‌న్స్ న‌త్త‌న‌డ‌క‌నే సాగుతున్నాయి.

బాలీవుడ్ సూప‌ర్‌ స్టార్స్ స‌ల్మాన్‌ ఖాన్‌.. అమీర్‌ ఖాన్ ఈ చిత్ర ట్రైల‌ర్ గురించి ట్వీట్ చేసినా వారందించిన క్రేజ్ ని `సైరా` టీమ్ క్యాష్ చేసుకోలేక‌పోయింది. దీంతో మెగా కాంపౌండ్ ప్లానింగ్ ఇంత వీకా అని అంతా విమ‌ర్శిస్తున్నారు. ట్రైలర్ రిలీజ్ కి కొద్ది రోజుల ముందు `సైరా` ప్ర‌మోష‌న్స్ చాలా వీక్ గా వున్నాయ‌ని.. చిరు సినిమాకు చేయాల్సిన ప‌బ్లిసిటీ చేయ‌డం లేద‌ని మెగా అభిమానులు కొంత మంది సోష‌ల్ మీడియా వేదిక‌గా విమర్శ‌లు చేసిన విష‌యం తెలిసిందే. అయినా మెగా కాంపౌండ్ మేల్కోక‌పోవ‌డం విచిత్ర‌మే.