సైరా.. ప్రమోషన్స్ తికమక ఏంటో!

ఒక సినిమాను ప్రేక్షకులకు చేరువ చేసేందుకు కంటెంట్ ఉంటే సరిపోతుంది అనేది పాతకాలం స్ట్రేటజీ. ఎందుకంటే మౌత్ టాక్ పాజిటివ్ గా ఉంటే నెమ్మదిగా కలెక్షన్స్ పికప్ అయ్యేవి. కానీ ఇప్పటి పరిస్థితుల్లో అది కుదరదు. వీనైనంత కలెక్షన్ ఫస్ట్ వీకెండ్ లో.. ఫస్ట్ వీక్ లో వచ్చేయాలి. లేకపోతే బ్రేక్ ఈవెన్ అనే మాటను మర్చిపోవల్సిందే అన్నట్టుగా ఉంది పరిస్థితి. ఇక స్టార్ హీరోల సినిమాలకు.. భారీ బడ్జెట్ సినిమాలకు ఇది ఇంకా ఎక్కువగా వర్తిస్తుంది. ఎందుకంటే సినిమాకు సూపర్ హిట్ టాక్ వస్తే ఎంత భారీగా కలెక్షన్స్ వస్తాయో.. బ్యాడ్ టాక్ వస్తే మాత్రం అంతకంటే దారుణంగా కలెక్షన్స్ పడిపోతాయి. అందుకే మొదటి వారం ఎడ్వాన్స్ బుకింగ్స్ కు ఎక్కువ ప్రాముఖ్యత ఉంది. కానీ దీనికి కావాల్సింది భారీ ప్రమోషన్స్.

మెగాస్టార్ చిరంజీవి కొత్త సినిమా 'సైరా' కు ప్రమోషన్స్ స్ట్రేటజీ వీక్ గా ఉందని ఇప్పటికే టాక్ ఉంది. ఈ సినిమా విడుదలకు మరో వారం రోజులే ఉంది. అయితే ఇంతవరకూ ప్రమోషన్స్ ఊపందుకోలేదు. ప్రీ రిలీజ్ ఈవెంట్ తప్ప మిగతా ప్రమోషన్స్ మొదలు పెట్టలేదు. దీంతో కొందరు మెగా ఫ్యాన్స్ తమ అసహనాన్ని సోషల్ మీడియా ద్వారా డైరెక్ట్ గానే వ్యక్తం చేస్తున్నారు. నిర్మాత రామ్ చరణ్ ను ఈ విషయంలో తప్పు పడుతున్నారు. సినిమాకు వారం రోజులే ఉన్నా 'సైరా' టీమ్ ప్రమోషన్స్ చేయడం లేదని ఆరోపిస్తున్నారు. ఇకనైనా స్ట్రాంగ్ ప్రమోషన్స్ మొదలు పెట్టాలని కోరుతున్నారు.

ప్రమోషన్స్ మరీ లేవని కాదు.. దర్శకుడు సురేందర్ రెడ్డి తప్ప మిగతా ఎవరూ ప్రమోషన్స్ లో కనబడడం లేదు. 'సైరా' టీమ్ కు ప్రమోషన్స్ విషయంలో ఉన్న ఇబ్బంది గురించి ఇండస్ట్రీలో ఒక కామెంట్ వినిపిస్తోంది. "నయన్ ప్రమోషన్స్ కు రాదు.. తమన్నా ప్రమోషన్స్ చేస్తానన్నా వద్దంటారు.. చిరు స్వయంగా ప్రమోషన్స్ చేస్తే ఆయన స్థాయికి తక్కువగా ఉంటుంది.. చరణ్ నిర్మాత కాబట్టి చేయకూడదు.. అందుకే డైరెక్టర్ సురేందర్ రెడ్డితో ప్రమోషన్స్ లాగిస్తున్నారని" చెవులు కొరుక్కుంటున్నారు.