బాలీవుడ్ చెక్కేసిన ఇద్దరూ కలుస్తున్నారు

టాలీవుడ్ సినిమాలతో కెరీర్ స్టార్ట్ చేసి.. ఆ తర్వాత బాలీవుడ్ లో పాగా వేసేందుకు ప్రయత్నిస్తున్న భామల జాబితా బాగానే పెరుగుతోంది. జెనీలియా.. ఇలియానా తర్వాత.. ప్రస్తుతం ఈ తరహా ప్రయత్నాలలో ఉన్న భామలు తాప్సీ పన్ను.. కృతి సనోన్. వీరి ఇద్దరి బేస్ ఇక్కడ కాకపోయినా.. తెలుగు సినిమాలతోనే కెరీర్ స్టార్ట్ చేశారు. ఝుమ్మంది నాదం అంటూ తాప్సీ మొదలుపెడితే.. 1 నేనొక్కడినే మూవీతో వచ్చింది కృతి సనోన్.

ఇప్పుడు వీరిద్దరూ బాలీవుడ్ లో తెగ ప్రయత్నాలు చేయడమే కాదు.. సక్సెస్ లు కూడా అందుకుంటున్నారు. వీరిద్దరూ ఇఫ్పుడో సినిమాలో కలిసి నటించే అవకాశం అందుకున్నారు. స్పోర్ట్స్ బ్యాక్ డ్రాప్ తో సాగే ఓ సినిమాకు తాప్సీ గతంలోనే సైన్ చేసింది. ఉమనియా అనే టైటిల్ పై తెరకెక్కే ఈ చిత్రంలో లీడ్ రోల్ తాప్సీ పన్ను చేయనుండగా.. మరో కీలక పాత్రకు కృతి సనోన్ ను ఫైనల్ చేశారని తెలుస్తోంది. ఫాంటమ్ ఫిలిమ్స్ బ్యానర్ పై రూపొందే ఈ చిత్రంలో.. విక్రమాదిత్య మొత్వాని.. మధు మంతెన.. వికల్ బెహల్.. అనురాగ్ కశ్యప్ కీలక పాత్రలు పోషించనున్నారు.

కొత్త దర్శకుడు ఈ చిత్రాన్ని రూపొందించనుండగా.. కృతి పాత్ర ఈ చిత్రానికి హైలైట్ గా నిలుస్తుందని అంటున్నారు. బెరైలీ కీ బర్ఫీ మూవీతో మెప్పించిన కృతి సనోన్ తో.. ఇప్పటికే ఒప్పందాలు పూర్తయిపోయాయట. ప్రస్తుతం అనురాగ్ కశ్యప్ మూవీ మన్మర్జియాన్ లో నటిస్తున్న తాప్సీ.. ఆ చిత్రం పూర్తి కాగానే కొత్త సినిమా షూటింగ్ స్టార్ట్ చేయనుంది.