అ బయోపిక్ కి సై అంటున్న తాప్సీ!

సినిమా సక్సెస్ కు ఫార్ములాలంటూ లేవని ఓ వాదన వినిపిస్తూ ఉంటుందిగానీ ఒక జానర్ లో సినిమా సక్సెస్ అయిందనుకోండి దాన్ని పొలోమంటూ ఫాలో అవుతారు. ఇప్పుడు ఇండియన్ ఫిలిం మేకర్స్ ను గట్టిగా ఫెవికాల్ లాగా తగులుకున్న ఆ జానర్ బయోపిక్స్. మొదట్లో బాలీవుడ్ వాళ్ళు మొదలుపెట్టారు గానీ.. ఇప్పుడు మాత్రం హిందీ లేదు.. తెలుగు లేదు.. మలయాళం లేదు అన్ని చోట్ల బయోపిక్కులే.. అవే ఇప్పుడు సక్సెస్ ఫార్ములాగా మారాయి.

వాటిలో కూడా క్రీడాకారుల బయోపిక్ లకు చాలా డిమాండ్ ఉంది. సరిగ్గా తెరకెక్కిస్తే 'దంగల్' లా బాక్స్ ఆఫీస్ ను నాగలితో దున్నేయొచ్చు. అందుకే ఇప్పటికే చాలా బయోపిక్ లు ప్లానింగ్ దశలో ఉన్నాయి. పుల్లెల గోపీచంద్ - సైనా నెహ్వాల్.. సానియా మిర్జా.. సింధు బయోపిక్ లు వాటిలో కొన్ని. ఇవి కాకుండా తాజాగా హైదరాబాద్ బేస్డ్ లేడీ క్రికెటర్ మిథాలి రాజ్ బయోపిక్ కూడా తెరమీదకు వచ్చింది. మిథాలి రాజ్ ఇండియా వుమన్ క్రికెట్ టీమ్ కు సారధ్యం వహించడమే కాకుండా దేశానికి ఎన్నో విజయాలను సాధించి పెట్టింది.

ఇప్పుడు మిథాలి బయోపిక్ ను తెరకెక్కించేందుకు ప్రముఖ బాలీవుడ్ ప్రొడక్షన్ హౌస్ వయాకామ్ 18 ముందుకు వచ్చింది. ఆల్రెడీ మిథాలి నుండి అవసరమైన అనుమతిని తీసుకొని స్క్రిప్ట్ ను తీర్చిదిద్దుతున్నారట. ఈ సినిమాలో మిథాలి పాత్రలో డింపుల్ బ్యూటీ తాప్సీ పన్ను నటిస్తుందని ఇప్పటికే బాలీవుడ్ మీడియా కోడై కూస్తోంది.

'ముల్క్' సినిమా ప్రమోషన్స్ తో బిజీ గా ఉన్న తాప్సీ ని ఇదే విషయం పై అడిగితే "వాళ్ళు కనుక ఆ పాత్ర కోసం నన్ను సంప్రదిస్తే నేను చాలా హ్యాపీ. నాకు చాలా రోజుల నుండి స్పోర్ట్స్ బయోపిక్ చేయాలని ఉంది'.. అంటూ పాజిటివ్ గా స్పందించింది. తాప్సీ గ్లామర్ గర్ల్ లా మాత్రమే కాకుండా 'పింక్' లాంటి సినిమాల ద్వారా ఇప్పటికే మంచి నటిగా ప్రశంసలు అందుకుంది. మరి ఈ సారి క్రికెటర్ అవతారమెత్తి ఫోర్లు సిక్సులు బాదటానికి సై అంటోంది. ఏంటో అందమైన పిల్ల ఏం చెప్పినా అందంగానే ఉంటుంది!