అమ్మ‌మ్మ‌లా మారిపోయి షాకిచ్చింది!

వ‌రుస ప్ర‌యోగాల‌తో తాప్సీ బాలీవుడ్ కే కొత్త పాఠాలు నేర్పిస్తున్న సంగ‌తి తెలిసిందే. పింక్, నామ్ ష‌బానా, మ‌న్మార్జియాన్ వంటి చిత్రాల‌తో విల‌క్ష‌ణ న‌టిగా పేరు తెచ్చుకుంది. దిల్లీ బ్యూటీ అయ్యి ఉండీ.. ఆరంభం ఒక సౌత్ నాయిక‌గా పాపులారిటీ తెచ్చుకుని, అటుపై బాలీవుడ్ లో అడుగు పెట్టి ఈ స్థాయికి ఎదిగిన వేరొక న‌టి లేరంటే అతిశ‌యోక్తి కాదు. ప్ర‌స్తుతం తాప్సీ ఎంపిక‌లు అభిమానుల‌కు పెద్ద స‌ర్ ప్రైజ్‌నే ఇస్తున్నాయి.

తాజాగా ఓ 60 ఏళ్ల వృద్ధురాలిగా ఈ చిల్లు బుగ్గ‌ల సోయ‌గం న‌టిస్తుండడం అభిమానుల్లో ప్ర‌ముఖంగా చ‌ర్చ‌కు వ‌చ్చింది. 28 వ‌య‌సు అమ్మాయి 60 వ‌య‌సు వృద్ధురాలిగా న‌టించ‌డ‌మా? అంటూ అందరిలో ఒక‌టే ఆశ్చ‌ర్యం. అయితే అందుకు త‌గ్గ‌ట్టే త‌న రూపాన్ని, ఆహార్యాన్ని మార్చుకుని తాప్సీ ఇస్తున్న స‌ర్ ప్రైజ్ మామూలుగా లేదు. ఇంత‌కీ తాప్సీ ఎందుకింత సాహసం చేస్తోంది? ఎవ‌రి పాత్ర‌లో న‌టిస్తోంది? అంటే ప్ర‌ఖ్యాత షార్ప్ షూట‌ర్ చంద్రో తోమ‌ర్ పాత్ర‌లో తాప్సీ న‌టిస్తోంది. చంద్రో తోమ‌ర్ షూట‌ర్ దాదీగా ప్ర‌పంచ‌వ్యాప్తంగా సుప‌రిచితం. లేటు వ‌య‌సులోనూ త‌న‌కు అసాధార‌ణ‌ పాపులారిటీ ఉంది. జాతీయ స్థాయి షూట‌ర్ గా ఎన్నో ప‌త‌కాల్ని గెలుచుకున్నారు. 15 మంది మ‌న‌వ‌లు మ‌న‌వ‌రాళ్లు ఉన్న అమ్మ‌మ్మ‌గానూ చంద్రో తోమ‌ర్ ఫేమ‌స్.

తాను చేయ‌బోతున్నా పాత్ర గురించి మాట్లాడుతూ.. ఇలాంటి ఓ పాత్ర‌లో న‌టించ‌డం ఎంతో క‌ష్టం. 60 వ‌య‌సు వృద్ధురాలిగా ఎమోష‌న్స్ పండించ‌డం ఛాలెంజ్ తో కూడుకున్న‌ది అని తాప్సీ తెలిపారు. ఇక తాప్సీ త‌న‌ని తాను అద్దంలో చూసుకుని ఆ ఛేంజోవ‌ర్ కి ఆశ్చ‌ర్య‌పోయింద‌ట‌. ఆన్ లొకేష‌న్ తాప్సీ గెట‌ప్ చూసి త‌న త‌ల్లిగారు సైతం అంతే స‌ర్ ప్రైజ్ అయిపోయార‌ట‌. వ‌రుస‌గా ప్ర‌యోగాత్మ‌క పాత్ర‌లు ఎంచుకుని సాహ‌సాలు చేస్తున్న తాప్సీ మ‌రో లెవ‌ల్ కి ఎదిగేస్తుంద‌న‌డంలో సందేహ‌మేం లేదు. అయితే టాలీవుడ్ లో అలా ప్ర‌యోగాలు చేసే ద‌ర్శ‌కులెవ‌రూ తాప్సీకి క‌నిపించ‌క‌పోవ‌డం వ‌ల్ల‌నే ఇటువైపే చూడ‌టం లేద‌న్న‌మాట‌!